Siglir tar il cuntegn

Header

audio
Critica davart investiziuns en la plazza aviatica a Samedan
Or da Actualitad dals 15.01.2022.
laschar ir. Durada: 3 minutas 35 Secundas.
cuntegn

Plazza aviatica Samedan Dumondas criticas da «Terrafina» e «Forum Engiadina»

La finanziaziun dal project dad 88 milliuns francs en la plazza aviatica regiunala, vegn crititgada da las duas organisaziuns.

Las duas organisaziuns «Terrafina» e «Forum Engiadina» vulan respostas. Quai suenter che la plazza aviatica ha orientà il zercladur 2021 davart ils plans d'investiziun. Quels èn cun 88 milliuns francs quatter giadas pli auts che approvà avant tschintg onns dal suveran d'Engiadin'Ota. Ils ulteriurs 66 milliuns francs duain vegnir finanziads da las interpresas d'helicopter ed ulteriurs privats, d'in uschenumnà «Public Private Partnership» (PPP).

Las organisaziuns «Terrafina» e «Forum Engiadina» crititgeschan quest plan e vulan surtut savair, sche la INFRA sco instituziun da dretg public metta en dumonda sia atgna organisaziun. Quella era numnadamain vegnida creada il 2017, per evitar ina privatisaziun da la plazza aviatica regiunala. Perquai vulan las duas organisaziuns era savair pertge che l'INFRA contractescha insumma cun investiders privats, sch'ina participaziun da tals n'è betg admessa.

Il mument da las dumondas

Che las organisaziuns vegnan pir in mez onn suenter cun questas dumondas haja da far cun la «Charta da la plazza aviatica».

Nus avevan la speranza che questas dumondas centralas vegnian respundidas en la charta. Entant han ins però vesì ch'i n'è betg bler concret en quella.
Autur: Jost Falett commember dal cussegl da fundaziun «Terrafina Engiadina»

Per Christian Meuli, il president da la INFRA, n'èn las dumondas da las duas organisaziuns betg novas.

La lescha prevesa ch'ins po collavurar cun privats. L'infrastructura resta dentant en il maun public, quai ha il suveran decidì e quai vegn a restar uschia.
Autur: Christian Meuli president da l'INFRA plazza aviatica regiunala Samedan

L'infrastructura da la plazza aviatica tutga a l'INFRA, pia al maun public. Manada vegn ella dentant da la «Engadin Airport SA», ina firma privata. En pli vegn collavurà cun pliras firmas d'helicopter privatas.

RTR novitads 17:00

Artitgels legids il pli savens