Ils novs plans sajan en lur segn, han respundì ils responsabels da la Rega sin dumonda da RTR. Uss possia l’organisaziun da salvament realisar la basa en ses lieu preferì sin l’areal da la plazza aviatica.
Cuntents cun ils plan èn era ils gestiunaris da quella, l’Engadin Airport. Surprendida sa mussa percunter la deputada da la PS, Franziska Preisig. Che la Rega possia bandunar uss il lieu oriund per savair construir sia basa en in nov lieu na saja betg stà previs.
Er sch’i detta bleras dumondas avertas, saja ella uss optimistica ch’ins possia chattar questa giada soluziuns cuminaivlas che cuntentan tut ils involvids.
Quai dovria dentant pazienza, ha ditg il president da l’INFRA, Mario Cavigelli en in discurs cun RTR:
Sche nus dumagnain quai en ils proxims 10 onns, è quai in grond success.
La Rega dovra il pli tard en trais onns dapli spazi – perquai vegn sco l’emprim la basa d’helicopters construida. Mesemna ha l'INFRA Plazza aviatica regiunal Samedan annunzià ses plans. Cun il squitsch da temp sajan ils partenaris involvids sa cunvegnids da realisar sco emprim ina nova basa per ils helicopters.
Quella duai servir a la Rega, a la Heli Bernina ed a la Swiss Helicopter Group. Ella dovra en connex cun la modernisaziun da la flotta da helicopters da l’interpresa novs indrizs.
La Rega surpiglia tenor la communicaziun la prefinanziaziun da la nova basa, sco era la planisaziun e la realisaziun da quest project parzial. Il heliport vegn realisà en il nord da l’areal da la plazza aviatica.
Preparativas per la segunda etappa
L'INFRA maina la part dal project per ils hangars dals aviuns ed ils champs che tutgan vitiers, per il bajetg da manaschi ed il terminal. La plazza per in manader general dal project vegn scritta ora, quel duai cumenzar la primavaira dal 2024. E per finanziar il project da construcziun dovri tenor la INFRA in’ulteriura votaziun dal pievel en las vischnancas da la regiun.
La dumonda d’ina saiv enturn l’entira plazza aviatica ha la pli auta prioritad da segirezza, per l’Uffizi federal per l’aviatica civila BAZL. Planisà saja da construir ina saiv engiadinaisa, or da lain da laresch indigen e giatter da cruschada.
Or da l'archiv:
