Siglir tar il cuntegn

Header

video
Coronavirus mutà a San Murezzan
Or da Telesguard dals 18.01.2021.
laschar ir
cuntegn

Plirs cas dal virus mutà San Murezzan: Scolas serradas ed obligatori da mascrinas dapertut

A San Murezzan hajan ins constatà plirs cas d'ina mutaziun dal virus. Il chantun e la vischnanca han perquai prendì mesiras. Vinavant recumondan els a la populaziun, da desister sin tut ils contacts nunnecessaris e da tegnair en las mesiras da distanza ed igiena. Il mardi han lieu tests da massa.

A San Murezzan hajan ins constatà plirs cas d'ina mutaziun dal virus. Quai scriva l'Uffizi chantunal da sanadad. En l'hotel Badrutt's Palace ed il Grand Hotel Kempinski des Bains hajan ins actualmain 12 cas positivs. Per ils dus hotels hajan ins ordinà quarantina e tests per tut il persunal ed ils osps.

Vinavant han chantun e vischnanca decidì las suandantas mesiras:

  • En la vischnanca vala in obligatori da purtar mascrina.
  • Las scolas, canortas d'uffants pitschens e scolas da skis vegnan perquai serradas. Scolaras e scolars cumenzan cun l'instrucziun a distanza. Cura che scolas e canortas pon puspè avrir n'è anc betg enconuschent
  • Mardi, ils 19 da schaner, vulan ins far tests da massa per tut la populaziun. L'Uffizi da sanadad recumonda a tut la populaziun ed a tut ils osps da sa participar. Ils tests vegnan fatgs analog al project da pilot dal december passà.

Tests da massa per populaziun ed osps

Avrir la boxSerrar la box

Mardi, ils 19 da schaner, han lieu tests da massa per la populaziun e osps. L'acziun da test è gratuita e schabegia sin ordinaziun dal Uffizi da sanadad dal Grischun. Testà vegn en dus lieus: En la halla da gimnastica da la scola veglia ed en la halla da baiver dal bogn a San Murezzan Bad. Ils tests han lieu tranter las 08:00 e las 18:00 uras.

Annunziar sa pon ins sin la pagina d'internet da la vischnanca, il link avra en ina nova fanestra u er directamain al lieu. Per uffants tranter 5 e 12 onns èsi pussibel da far in test da spida en accumpagnament da lur. Giuvenils fin 18 onns dovran il consentiment dals geniturs sch'els cumparan persuls al test.

Las autoritads appelleschan da prender part al test. Resultats positivs vulan ins lura examinar sin la mutaziun.

Vinavant recumonda la taskforce a tut ils affars en Engiadin'Ota, da laschar testar lur persunal. Ils custs perquai surprendia la Confederaziun.

Territoris da skis restan averts

Per las scolas, hotels e purschidas turisticas en ils auters vitgs na datti naginas restricziun. Er tut ils territoris da skis en la val restan averts. Quai communitgescha la taskforce da corona en Engiadina. Las scolas da skis da Schlarigna e Samedan vegnan dentant serradas. Ellas tutgan numnadamain tar la scola da skis da San Murezzan.

Uffizi chantunal fa quitads

L'Uffizi chantunal fetschia quitads: La mutaziun dal virus saja pli contagiusa. Els recumondan perquai a la populaziun, da desister sin tut ils contacts nunnecessaris e da tegnair en las mesiras da distanza ed igiena. L'uffizi da sanadad saja en contact stretg cun la vischnanca. Sche necessari vegnan ins a prender ulteriuras mesiras.

Ils concepts da segirezza dals hotels sajan dentant vinavant buns. Quai di il manader da l'uffizi, Rudolf Leuthold. Mo perquai ch’ils hotels testeschian regularmain lur collavuraturs, sajan quels cas da mutaziun insumma vegnì uschè spert a la glisch. Co igl è stà pussibel ch’i haja insumma dà infecziuns, sajan ins anc vid sclerir.

RTR novitads 06:30

Artitgels legids il pli savens

Scrollar a sanestra Scrollar a dretga