Siglir tar il cuntegn

Header

cuntegn

Plirs tschientmilli francs Grond donn da material suenter incendi a Strada

La mesemna èn brischadas ina stalla ed ina chasa engiadinaisa a Strada. Igl ha dà in grond donn material. Quai scriva la Polizia chantunala. Il pur da 20 onns era gist en l’uigl, cura ch'il gru da fain è sa fermà. Spert ha l’um vis ch’in incendi en la part sura da la stalla è il motiv da l’interrupziun.

Immediat ha el procurà per l’evacuaziun da la famiglia sco er da las passa 30 vatgas e bovs. Ils pumpiers da Muttler, Pisoc e Samignun èn stads occupads cun ina tschientina da forzas d’intervenziun enfin la gievgia baud la damaun per stizzar l’incendi. In team dal servetsch da salvament da Scuol ha controllà il pur cun suspect sin ina tissientada da gas da fim ed ha tractà quel a moda ambulanta. Suenter las lavurs da stizzar han ins installà ina guardia d’incendi. Vi da la chasa e stalla hai dà in donn material da plirs tschientmilli francs. La Polizia chantunala dal Grischun eruescha la raschun per l’incendi.

RTR novitads 11:00

Artitgels legids il pli savens