Il temp nua che las plantas flureschan en tut las colurs è passà en l'orticultura Müller a Susch. Da las sis impiegadas ed impiegads che lavuran sur stad lavuran uss anc trais ortulans. Tuttina èn ils dis da lavur anc intensivs per la famiglia Müller. Numnadamain èsi da preparar tut per la stagiun fraida d’enviern. Tagliar enavos e liar si plantas, rumir e far urden empè da far vacanzas, hai num per la famiglia.
Metter la basa per la primavaira
Cun la lavur d’atun sa prepara l’orticultura gia per la primavaira. «La natira na resta mai propi saldada. Er sch’ella va uss a durmir, sa prepara ella gia per la primavaira. Quai faschain er nus cun trair suenter tschertas plantinas u cun far las emprimas empustaziuns», di Elisa Bonorand-Müller, la manadra da l'orticultura.
Lavur datti pia er durant ils mais d’enviern en l’orticultura. Durant il mais da schaner sa permetta però er la famiglia Müller da far in per emnas vacanzas.
