Mintg’onn premiescha il «Beobachter» persunas ch'han mussà curaschi ed engaschament per il bainstar public. Tschertgadas vegnan persunas ch’èn dadas en egl pervi da l'engaschament altruistic e ch’han demussà curaschi per autra glieud – saja quai cun tscherts acts, cun projects, cun in engaschi a lunga vista u schizunt cun in'ovra da la vita.
Pervi da malcunvegnientschas desditg la plazza
Ladina Christoffel è vegnida nominada per il Prix Courage perquai ch'ella, sco anteriura schefmedia da la clinica da dunnas, ha rendì public las cundiziuns da lavur difficilas e las violaziuns cunter la lescha da lavur a l'Ospital regiunal d’Engiadin’Ota a Samedan ed è s’engaschada encunter quellas.
Ladina Christoffel ha dà si sia posiziun, perquai ch'ella na pudevia betg pli purtar la responsabladad per las cundiziuns problematicas. Il «Beobachter» descriva ses pass sco «trair il frain d'urgenza – per il bain dals pazients e dal persunal». Ladina Christoffel ha fundà, ensemen cun duas autras medias da cader, la cuminanza d'interess Pro Medico Plus ed ha infurmà l'inspecturat chantunal da lavur. Rapportas da l'inspecturat da lavur grischun han pli tard confermà dapli che 3'000 violaziuns cunter la lescha da lavur a l'ospital tranter il 2022 ed il 2024, tranter auter «violaziuns parzialmain gravantas da las reglas dal temp da lavur e da paus».
Ses engaschi haja manà al fatg che plazzas supplementaras èn vegnidas creadas ed ina cumissiun dal persunal sco er in post da rapport extern èn vegnids installads, ha ditg Ladina Christoffel.
Il pass vers l'independenza
Suenter sia demissiun da l'ospital ha Christoffel avert ina nova pratica per la sanadad da las dunnas, la Chasa Sana amez Samedan.
Davent da la fin settember decida il public
Sper Ladina Christoffel il Beobachter nominà era tschintg autras persunas per il Prix Courage 2025. Davent dals 23 da settember po il public vuschar per trais candidats, e suenter decida ina giuria da persunalitads, tgi che survegn il premi dota cun 15’000 francs als 13 da november a Turitg.