Gia il schaner 2016 avevan las autoritads fiscalas da Turitg pretendì il pajament da 65 milliuns francs. Quai per garantir la taglia federala directa, cunquai che Schwarzenbach era lura en l'exteriur. Quatras è quest cumond da segirar ils daners ì a divers uffizis da scussiun - e sco responsabel per la coordinaziun da la scussiun han las autoritads fiscalas da Turitg incumbensà l'uffizi da scussiun da Malögia.
L'onn 2021 hai danovamain dà in cumond da procurar 65 milliuns francs. Il rimnader d'art Schwarzenbach – ch'aveva en il fratemp dischlocà ses domicil en il chantun Turitg – ha dentant purtà plant encunter il fatg che l'uffizi da scussiun Malögia saja responsabel per la scussiun. La Dretgira chantunala dal Grischun ha gia refusà ses recurs il settember 2022, uschia che Schwarzenbach ha fatg recurs al Tribunal federal.
Gia pers ina sumeglianta procedura
En la sentenzia ch'è vegnida publitgada la gievgia argumentescha il Tribunal federal, che la lescha na prevesia bain betg expressivamain ch'in uffizi da scussiun ordaifer il chantun possia esser responsabel en tals cas. I sa tractia qua d'ina largia da lescha nunvulida. I dettia però gia cas da precedenza. Pir dacurt haja la dretgira la pli auta renconuschì che tals cumonds da segirar daners per l'entira Svizra sajan valaivels. Quai premettia però ch'in uffizi da scussiun responsabel vegnia fixà per l'execuziun coordinada.
Tar questa procedura la primavaira 2022 èsi medemamain ì per Schwarzenbach. Quella giada hai dà in cumond da segirar 140 milliuns francs. Er en quest cas aveva l'uffizi da taglia da Turitg surdà a l'uffizi da scussiun Malögia il lead per garantir las valurs da facultad.
