La fundaziun ha preschentà il victur da la concurrenza d’architectura per las otg abitaziuns prevesidas amez il vitg, davos il center «Rondo». El è il victur dals bundant 90 concurrents e concurrentas per il project: «Babetin» dal «Atelier Candrian Meier» a Turitg.
-
Bild 1 von 3. Il lieu amez Puntraschigna: Qua duai la chasa vegnir bajegiada. Bildquelle: Fundaziun da Puntraschigna.
-
Bild 2 von 3. Il project victur «Babetin». Bildquelle: Fundaziun da Puntraschigna.
-
Bild 3 von 3. Visualisaziun dal project victur. Bildquelle: Fundaziun da Puntraschigna.
Tenor infurmaziuns dal president da la fundaziun Andreas Flury vegn il project a custar 6 milliuns francs. Il cumenzament da las lavurs da construcziun da la chasa è prevesì per quest onn che vegn.
Fundaziun cun «cumond» da realisar spazi d’abitar pajabel per indigens ed indigenas
Dapi circa dus onns è la Fundaziun da Puntraschigna gia activa. Ella è incumbensada da la vischnanca per sustegnair projects da construcziun u renovaziuns d’abitaziuns cun in util public e per realisar era sezza spazi d’abitar per indigens ed indigenas. Per il mument è la fundaziun finanziada per gronda part da la vischnanca da Puntraschigna. Cun in mez milliun francs capital da dotaziun e cun in credit sur da 1.5 milliuns francs duess il bajetg da la chasa nova vegnir finanzià. Il credit ha però anc da vegnir aderì dal suveran.
Il prim project «pront» per la fundaziun
Dentant na basta quai betg per la finamira da finanziar la mitad da la nova chasa cun agens meds. Quai era per far vegnir pli bunmartgads ils fits da banca e cun quai era ils fits per las abitaziuns.
La finamira è dad avair in fit-chasa net da maximalmain 2’000 francs al mais. Uschia ch'era famiglias pon sa prestar da star en la chasa.
Per la Fundaziun da Puntraschigna è questa chasa il prim project palpabel. Quai saja tenor il president Andreas Flury uss in pass che dat la forza e motivaziun per ir vinavant cun la lavur da la fundaziun. Quella saja en il medem mument vi da numerusas autras tractativas, sco per exempel cumprar abitaziuns u chasas, però era terren da fabrica sin il territori da Puntraschigna.
Naginas abitaziuns socialas, pero abitaziuns pajablas
Da subvenziunar ils fits da chasas sco tar projects da bajegiar socials n'è betg l’idea tenor Flury. Ils projects e surtut edifizis novs tar ils quals la fundaziun è sa participada, duain sa purtar finanzialmain sezs. Perquai na pon ins betg discurrer d'abitaziuns socialas, però da spazi d’abitar pajabel.