La vischnanca da Puntraschigna vul realisar abitaziuns pajablas per indigens en la zona per edifizis e stabiliments publics (tud: «ZöBA») dal parcadi Mulin, en il center dal vitg. Quest pass represchentass ina innovaziun, perquai che talas zonas èn tradiziunalmain reservadas per bajetgs publics sco scolas e chasas d'attempads.
La mancanza da spazi d'abitar pajabel fatschenta gia dapi plirs onns la vischnanca. Cun mesiras sco in fond da 2 milliuns francs u la stgaffiziun da la «Fundaziun Puntraschigna» ha la radunanza communala ils ultims dus onns empruvà da far frunt a la mancaza d'abitaziuns pajablas. Ussa suonda cun las abitaziuns en zonas publicas pia ina idea anc pli innovativa.
Emprims signals positivs da las autoritads da Cuira e Berna dettia gia, di la presidenta communala da Puntraschigna Nora Saratz Cazin. Il project innovativ avess in caracter da pilot e pudess era servir sco model per autras vischnancas.
Jau hai udì emprims signals positivs dal chantun e da la Confederaziun. Diversas leschas chantunalas lubissan per exempel gia oz che abitaziuns per senioras pon vegnir realisadas en zonas per edifizis publics. In project sco quel da Puntraschigna n’ha enfin uss dentant anc inoltrà nagina vischnanca en Svizra.
Durant in lavuratori èn ins sa cunvegnì che l'idea oriunda da construir abitaziuns per senioras e seniors sur la chasa da parcadi Mulin a Puntraschigna na correspundia betg pli als basegns actuals. Enstagl duain vegnir construidas abitaziuns pajablas cun adattaziuns da pretsch tenor salari. In mix da studios, abitaziuns pitschnas e famigliaras fiss planisà – cun la gronda part dals objects per famiglias.
Anc bleras dumondas avertas
La suprastanza da Puntraschigna ha l'intenziun da lantschar ina concurrenza da projects per elavurar las ideas, e las transfurmar en in project concret, di Nora Saratz Cazin. En sia sesida dals 22 d’avust s'occupa la suprastanza intensivamain da l’idea ed instradescha ils proxims pass.
Il dilemma cun las segundas abitaziuns
Fertant che la populaziun locala patescha d’ina mancanza d’abitaziuns pajablas, datti dentant adina dapli segundas abitaziuns – quai malgrà l’iniziativa dal 2012 che vuleva limitar abitaziuns da vacanzas sin 20%.
Il 2023 ha la vischnanca creà la «Fundaziun Puntraschigna» che duai cumprar, vender e dar a fit emprimas abitaziuns. Finanziar vuleva Puntraschigna questa fundaziun cun ina taxa directiva sin segundas abitaziuns. In questiunari dal 2024 cun passa 600 participants e participantas ha dentant mussà ch'i na dat nagin sustegn en la populaziun per questa taxa – i na saja betg ina soluziun gista per tuts. Perquai ha la suprastanza communala la finala desisti d'ina tala taxa. Tenor la presidenta communala, Nora Saratz Cazin, tschertgian ins alternativas per rimnar ils radund 9 milliuns francs per finanziar la fundaziun.
Or da l'archiv: