Puntraschigna vul introducir ina taxa directiva per segundas abitaziuns. Quest intent ha la suprastanza preschentà il december passà a la populaziun.
Dapi ils 8 da schaner 2024 datti ina procedura da cooperaziun, nua che tuts duain sche pussibel deponer lur ideas ed opiniuns. Per sustegnair quai ha ina gruppa d’interess cun radund 120 commembers e commembras lantschà ina campagna sin las raits socialas.
Nus vulain en emprima lingia motivar uschè blera glieud sco pussaivel da sa participar al process politic. I va numnadamain per l’avegnir da noss uffants e da noss biadis.
La situaziun saja acuta, uschè las vuschs ord la gruppa d’interess. Puntraschigna ha actualmain 65% segundas abitaziuns. Adina dapli indigens ed indigenas bandunan il vitg perquai ch’ellas ed els na chattan betg abitaziuns pajablas.
Fasa d’evaluaziun cumenza ils 7 da favrer
Enfin ils 6 da favrer 2024 dura anc la procedura da participaziun. Suenter vul la vischnanca evaluar las ideas e resultats, uschè la presidenta communala, Nora Saratz Cazin. Quai vegnia fatg en furma anonima.