Damai che Puntraschigna ha nudà bunas cifras ils davos onns vul la suprastanza communala sbassar il pe da taglia communal per 10%. Da nov duai la taglia anc esser tar 75% da la taglia chantunala simpla, ha decidì la suprastanza en sia davosa sesida.
Quai muntass passa 800'000 francs damain entradas fiscalas. Sche la radunanza communala dals 29 da settember di Gea a la reducziun dal pe da taglia pudessan ils pajataglias profitar l'emprima giada cun il quint fiscal provisoric dal 2023.
Rempar empè da monitoring
Il rempar existent cunter la crudada da crappa en la zona da «La Resgia» vegn rinforzà. La suprastanza communala da Puntraschigna ha incumbensà l’Uffizi da guaud e privels da la natira da planisar e realisar il project. Ils custs èn budgetads cun 75’000 francs. 80% da quels vegnan subvenziunads da la Confederaziun e dal chantun.
Il fanadur han geologs visità il lieu e constattà nagin privel acut pli. Perquai n'èsi betg pli necessari da mesirar cuntinuadamain la massa instabila, mabain da rinforzar il rempar. Il territori vegniva surveglià dapi la stad 2020, cura che 80 meters cubic crappa era crudada. Er l'onn passà hai dà plirs moviments dal grip ed ins ha stuì serrar vias da viandar e sendas da rampignar.
