Il cussegl da sanadad ed il cussegl d’administraziun da la Sanadura han discutà la missiva per il provediment da sanadad per l’Engiadin’Ota. Ils votants e las votantas da las 11 vischnancas da Segl fin S-chanf duain decider la fin da settember sur da quatter cunvegnas da prestaziun che duain valair ils proxims trais onns.
Nagins midaments per la purschida da l’ospital a Samedan
La cunvegna tranter la Sanadura e la Ospital d’Engiadin’Ota SA duai esser in ad in la medema sco quella ch'è en vigur fin la fin da quest onn. Quai vul dir: tut las purschidas - sco la staziun d’urgenza, la staziun dad uffants ed era quella per novnaschids - duain restar e vegnir manadas enavant sco fin qua. Era la cunvegna da prestaziun per las chasas da tgira a San Murezzan e Samedan, e quella per la Spitex, restan las medemas. E quai per la durada da trais onns a partir da l'entschatta 2027.
Custs n’èn betg dal tut clers
Enturn 28 milliuns francs èn tenor la Sanadura ils cust tras las quatter cunvegnas da prestaziun. Dus terzs èn per l’ospital regiunal a Samedan, ed il rest dals daners per il manaschi da las chasas da tgira e per la Spitex. Ina pitschna part cumpiglian ils custs da la Sanadura sezza. Tenor la Sanadura n’èn questas cifras però betg precisas, perquai ch'i manchian datas finanzialas. Cunquai che la Sanadura è pir en funcziun dapi trais mais, n'èsi betg simpel da far prognosas precisas per ils proxims onns.
I va svelt
En duas emnas vulan ils dus gremis da la Sanadura sa reunir danovamain. Quai per approvar ils midaments da la missiva e dar la glisch verda, per che quella possia vegnir tramessa en las chasadas da las 11 vischnancas en l'Engiadin’Ota ch'han da decider a l'urna davart las cunvegnas. Uschia duain ils votants e las votantas da Segl fin S-chanf decider la fin da settember, co che lur provediment da sanadad funcziuna e vegna finanzià ils proxims 3 onns.