Il plan per il futur dal provediment da sanadad d’Engiadin’Ota ch'ils responsabels e las responsablas da la fundaziun SGO han preschentà ier saira è vegni retschavì cun bainvulientscha dals preschents e preschentas ch’en s’exprimidas envers RTR.
Jau hai l’impressiun ch'ils responsabels e las responsablas han fatg fitg ina buna preparaziun. Perquai sun jau da l’avis che questa proposta è l’unica via per il futur.
Er Andrea Tramèr da Puntraschigna ha manegià ch’el saja en general per questa soluziun. Ed era schi dettia anc dumondas pervi da tscherts detagls, saja l’unica varianta da dir Gea.
Sutgas emplenidas, però dapli glieud a chasa davant la televisiun
Circa 240 persunas interessadas èn stadas preschentas fisicamain en il center da cultura e congress «Rondo» a Puntraschigna. RTR ha fatg in livestream da la sairada d’infurmaziun, durant il qual circa 650 persunas han tadlà las decleraziuns dals responsabels e da las responsablas da la SGO, dal Ospital Chantunal è da la Clinica Gut.
48 persunas tschiffan la desditga
La presidenta dal cussegl da fundaziun da la SGO, Selina Nicolay, aveva declerà durant la sairada d'infurmaziun che 50 persunas perdian lur plazza. Dentant n’era betg cler, tgi precis che tschiffa la charta blaua.
Ils responsabels dal provediment da sanadad d’Engiadin’Ota han entant infurmà che 48 impiegads da l’ospital a Samedan duain perder lur plazzas. Per la gronda part pertutga quai persunas da la tgira acuta. Sco Rolf Gilgen, il directur ad interim da l’ospital ha ditg, haja quai da far cun il fatg che pliras partiziuns vegnan serradas e radund 27 letgs vegnan stritgads.
Pauca speranza en procedura consultativa
Ils pertutgads da desditgas han la pussaivladad da prender posiziun durant il temp da la procedura consultativa che dura in’emna. Tenor Gilgen dettia forsa la pussaivladad da discurrer anc ina giada cun l’Ospital chantunal. La probabilitad che las desditgas vegnan annulladas saja però pitschna.
320 plazzas duain vegnir salvadas
En tut pudessan var 320 plazzas vegnir salvadas. Quai cuntenta la presidenta dal cussegl da fundasziun da la SGO Selina Nicolay, malgrà la situaziun deplorabla da las desditgas. Questas midadas èn prevesidas per il cummenzament d’avrigl. La premissa è però che la populaziun da l’Engiadin’Ota approvescha ils plans per fundar la nova structura dal provediment da sanadad.
Per Evelyn Hunger da Malögia, dapi 25 onns tgirunza a l’ospital regiunal a Samedan è quai ina situaziun pesanta.
A nus fa quai mal, sche glieud sto ir.
Claudio Camenisch da Schlarigna ha malavita per ils pertutgads e las pertutgadas da las desditgas. Quai saja la consequenza pli negativa che da questa situaziun