L’implant da scola a Puntraschigna sa cumpona or da la «Scoula sur» per l'emprima fin novavla classa e la «Scoula suot» per la scolina, lavurs manualas e religiun. Ultra da quai è la maisa da mezdi sut il medem tetg, ina butia ed in kino.
Basegn da renovaziun
La chasa da scola sut è passa 100 onns veglia e l’ultima renovaziun cumpletta è stada avant passa 60 onns. Il bajetg mussa entant mancos considerabels, tranter auter en la segirtad da terratrembels e l’effizienza energetica. Ina renovaziun cumplessiva è urgentamain necessaria per ademplir ils basegns d’utilisaziun actuals.
Il project ch’era gia vegnì preschentà a la radunanza communala da Puntraschigna prevesa ina surbajegiada ed in proceder da construcziun en etappas per mantegnair il manaschi da scola.
Grazia ad ina nova passarella duain las duas scolas vegnir colliadas ed uschia porscher er in access senza barrieras.
9 milliuns francs
Il project prevesa custs da 9 milliuns francs e permettess da desister da provisoris custus. El purschess spazi supplementar per la scola e las structuras dal di. Ultra da quai duai dar ina sala per l’utilisaziun multifuncziunala e la chasa da scola sut da Puntraschigna.
Votaziun a l’urna
Il suveran da Puntraschigna decida ils 18 da matg 2025 davart la dumonda da credit a l’urna.
Tar in GEA fetsch’ins quint d’inoltrar la dumonda da bajegiar anc quest atun. Suenter in onn da preparaziun, avessan las lavurs da cumenzar Pasca dal 2027 ed esser terminadas per Nadal dal medem onn.
Per la butia che sa chatta sin plaun terren da l’edifizi amez Puntraschigna na vegnia nagut a sa midar. Dentant haja il kino da restar serrà durant il temp da construcziun, uschia il responsabel infrastructuras Puntraschigna, Martin Enz.