La plazza Roseg dador il center da Puntraschigna chaschuna gia da pli divers onns per discussiuns. In hotel duai vegnir fabritgà sin terren, ch'è fin uss vegnì duvrà sco zona da sport, plazza da glatsch e plazza da giugar. Il suveran da Puntraschigna ha decidì avant bundant 11 onns per quest project cun il num Hotel Flaz.
Iniziativa, pass giuridics ed uss ina petiziun
Dal 2014 èn ils votants e las votantas da Puntraschigna sa decidì da stgaffir la basa legala da planisaziun – quai cun midar la zona pertutgada en ina zona d’hotel. Trais onns pli tard, dal 2017, ha quai dà ina iniziativa communala cunter il project d’Hotel. Quella è pero vegnida declerada nunvalaivla il prim da la vischnanca Puntraschigna e pli tard era dal tribunal federal.
Las dispitas giuridicas han cuntinuà fin uss. Davant la dretgira superiura chantunala è pendent ina protesta davart la prolungaziun dal permiss da fabrica da l'Hotel Flaz. Il cumenzament da mars ha ina gruppaziun enturn il advocat Diego Schwarzenbach lantschà ina petiziun cun actualmain circa 2'000 suttascripziuns per mantegnair la plazza da glatsch, da sport e da gieu.
La vischnanca refusa la petiziun
Per la vischnanca da Puntraschigna ha la petiziun ina finamira: dad impedir la fabrica dal nov hotel cun relaschar ina zona da planisaziun per l’areal. Tenor la vischnanca n'avess ina tala zona da planisaziun betg effect giuridic. Quai pervi da ch'il permiss da fabrica saja gia avant maun.
Era saja sin via gia in nov project per duvrar ils conturns da l’hotel nov sco ina plazza da glatsch, da sport e da gieu public, sco che la petiziun ha giavischà.
Reacziun dals petiziunaris e da las petiziunarias
Per las set persunas che stattan davos la petiziun, èn dischillus da la resposta, uschia Diego Schwarzenbach. Tenor els ed ellas avess'ins spetgà dapli da la vischnanca, sco per exempel da dumandar las votants e votants da Puntraschigna en chaussa.
Far frunt cunter questa refusa n’è betg pussaivel, perquai che quai saja be ina petiziun. En in proxim pass, vulan ils set petiziunaris e petiziunarias sa radunar da nov e discutar sco ir vinavant.
