Dapi il matg 2018 vegn lavurà sin la parcella da l’anteriur hotel Misani. Quel è dapi l’atun 2017 en possess da la Simmen Group. L’interpresa cun sez a Pfäffikon, ha planisà da sbuvar l’edifizi existent e remplazzar l’hotel cun in Aparthotel cun 12 abitaziuns gestiunadas.
La realisaziun dal project vegn dentant adina puspè interrutta. Uschia hai gia dà ina bloccada da construcziun avant in onn e mez, cura ch’il possessur n’aveva betg pli avunda raps per cuntinuar cun il project. Ed er ussa, suenter che las lavurs èn vegnidas interruttas ina segunda giada il cumenzament d'october, mancan ils raps, ha confermà il president communal da Schlarigna, Christian Brantschen,
Ils raps mancan
Sco quai che Patric Simmen ha laschà savair tras in pledader, haja la Simmen Group surdà il project ad ina interpresa ch'è spezialisada en sviluppar projects d’hotel. Quella aveva lura er chattà in investider privat. Dapi la primavaira na vegnia da quella dentant pli nagins raps.
Mument ideal per la tschertga
Grazia a la bloccada da construcziun sin l’areal da l’hotel Misani, hajan ins uss bain temp da tschertgar novs investiders ils proxims mais. Patric Simmen saja optimistic da tuttina pudair realisar ses project «Boutique Resort Misani». La finamira saja da cuntinuar cun la construcziun la fin da mars 2020. Dentant na finanzieschian bancas betg in tal project, i veglia investiders privats, argumentescha il pledader da la Simmen Group.
Ord l'archiv:
RR novitads 06:00