Tge è capità en il process?
L'emprim ha discurrì l'anteriur schef dal post da polizia. Sia interrogaziun ha cuzzà radund in'ura e mez. El ha dastgà prender posiziun sin tut las acziuns nua ch'i vegn renfatschà ad el d'avair malduvrà ses uffizi ed era sin la privaziun da la libertad da Quadroni. Ins sto dir «dastgar» perquai ch'ins ha en talas interrogaziuns era il dretg da refusar da dar perditga. Da quest dretg n'ha el dentant betg fatg diever.
El ha empruvà da respunder mintga dumonda e quai relativamain detaglià, era sch'i deva era magari chaussas davart quellas ch'el na sa regurdava betg pli en detagl. Las acziuns sajan era gia bain 10 onns enavos, è vegnì relativà.
En il center è surtut la dumonda stada sin basa da tge che Adam Quadroni è vegnì valità sco in privel per sasez ed auters. Quai è en sasez il punct central ch'ha lura era manà a tuttas acziuns tras la polizia.
L'anteriur schef dal post da polizia ha argumentà cun pliras istorgias nua che Quadroni saja sa mussà sco agressiv, ha menziunà perditgas anonimas ed argumentà che era ses superiurs hajan gì invista en blers puncts e dà raschun a l'agir. Sco el ha detg avant Dretgira na saja sia intenziun betg stada da «dar ina lecziun» a Quadroni el haja adina tractà el cun respect ed el haja gì cumpassiun per Quadroni e sia situaziun finanziala e familiara.
Era Quadroni è vegnì interrogà
Era Quadroni ha respundì a tut las dumondas. Igl è en spezial ì per il telefonat tranter el e l'anteriur schef dal post da polizia da Scuol. El ha argumentà ch'el n'haja fatg naginas smanatschas cun armas ad el.
Ma el vuleva simplamain dir cun quai ch'el ha ditg ch'el na saja betg malsegir. Uschiglio avess la polizia stuì confiscar tar el a chasa dapli rauba ch'ins pudess utilisar sco armas. Cunquai che quai è dentant la suletta acziun nua ch'i vegn concret renfatschà ad el insatge, è questa interrogaziun ida bler pli sperta, be circa ina mes'ura.
Tge è lura fin ussa gia cler?
La gievgia na vegni betg a dar ina sentenzia. Quai ha il derschader ditg a l'entschatta dal process. Ins quinta dentant da vegnir a fin la gievgia cun il process.
I vegn gia lura a dar en quest senn duas sentenzias, cunquai che l'anteriur schef dal post da polizia da Scuol, sco era Adam Quadroni sez vegnan accusads. Il chasti che vegn pretendì da la procura publica èn per l'anteriur policist ina chasti che privescha da la libertad da 24 mais cun temp d'emprova da dus onns. E per Adam Quadroni ina multa da 60 taxas da dis à 30 francs medemamain cun in temp d'emprova da dus onns.
Il temp d'emprova munta en quest cas sch'i capita entaifer dus onns nagut – lura na va il chasti betg en vigur. E co va quai ussa enavant a Scuol? Il suentermezdi suondan ils pledoyers da tuttas partidas.
Pliras chaussas vegnan la gievgia tematisadas avant la dretgira regiunala Engiadina Bassa/Val Müstair. En il center dal process stat l'arrest dal whistleblower Adam Quadroni dal 2017. Quadroni era vegnì arrestà a moda e maniera vehementa da plirs grenadiers da polizia. Plinavant vai per la perquisiziun da sia chasa, la collocaziun psichiatrica e la rolla da l'anteriur schef dal post da polizia da Scuol.
Per tge vai concret?
Accusà vegn dad ina vart l'anteriur schef dal post da polizia. Qua vai per la dumonda sche quel ha fatg abus d'uffizi ed i va per la privaziun da la libertad da Quadroni en connex cun l'arrestaziun dals 15 da zercladur 2017. Accusadra è tant la Procura publica, sco er Adam Quadroni sez sco accusader privat. Quest pass sa basa sin in recurs da Quadroni.
Da l'autra vart vegn dentant era Quadroni sez accusà. Tar el vai per smanatschas e violenza encunter la polizia durant l'arrestaziun. Tge precis che vegn renfatschà vegn dentant pir enconuschent la gievgia. Per tuts vala la presumziun d'innocenza.
Emprim sistì – uss vai vinavant
Il 2018 aveva il Departament da giustia inoltrà ina denunzia encunter nunenconuschent. Quai è capità sco reacziun da las publicaziuns dal magazin online «Republik». Era Quadroni aveva fatg ina denunzia. La procedura penala è vegnida averta – dentant puspè sistida quatter onns pli tard. La procedura penala ha argumentà ch'i n'haja dà nagin suspect da malfatg encunter il policist.
Cunter la sistida da la procedura penala ha Quadroni fatg recurs tar la Dretgira chantunala. Lezza aveva il 2024 approvà plirs puncts da quest recurs. La procura publica ha stuì investigar vinavant – ed uss è il cas avant dretgira.