Gist durant il temp da corona duess ins spargnar, quai han manegià gist al cumenzament diversas persunas en la sala da gimnastica a Scuol. La vischnanca da Scuol aveva previs d’investir radund 9 milliuns in differents projects, ma a trais da quels ha la radunanza ditg cleramain Na. Tenor il president communal Christian Fanzun era questa radunanza organisada, surpli èn ils trais projects vegnids refusads mintgin cun radund 100 vuschs encunter radund 70.
Cun refusar ils trais projects – numnadamain la sanaziun dal conduct d’aua sur la punt da Sur En/Sent, la cumpra dad ina parcella en la zona da mastergnanza e finalmain cun refusar il credit da bunamain in milliuns francs per realisar ina nova plazza davant la scola a Fontana/Tarasp – vegnan ussa investids mo radund 7,5 milliuns.
En general han divers preschents a la radunanza crititgà a la vischnanca ch’els infurmeschan betg transparent avunda a reguard ils projects previs. Oravant tut tar il project da la sanaziun da la punt Gurlaina èsi vegni crititgà ferm la procedura da communicaziun, quai malgrà che ils responsabels da la vischnanca avevan preparà minuziusamain per pudair preschentar il project ed era la cumissiun da gestiun ha gì la pussaivladad da prender posiziun e declerar che tut haja funcziunà sco previs tar quel project.
La radunanza communala a durà 5 uras, sper ils differents credits ha la populaziun era consentì il preventiv da gestiun 2021.
