Ils 12 cussegls da vischnancas han gì l’incumbensa dad infurmar a la conferenza da presidents sche els hajan interess da sa participar ad ina gruppa da lavur che duai elavurar ina missiva per ina eventuala fusiun da las vischnancas da tut la Regiun Malögia, numnadamain da la Bregaglia fin a S-chanf.
Las trais vischnancas la Punt-Chamues-ch, Zuoz e S-chanf han decis da betg sa participar a quella gruppa or da differents motivs. La conferenza da presidents da la Regiun Malögia ha tuttina decis da cuntinuar senza quellas trais vischnancas, ha però cleramain infurmà ch’els astgan reponderar la decisiun ed entrar er pli tard.
La gruppa da lavur consista da presidentas e presidents da las vischnancas – senza ils trais menziunads – ed ha ussa l’incumbensa dad elavurar ina missiva nua che vegnan scleridas las dumondas fundamentalas dad ina fusiun. Tar quellas tutgian er dumondas davart il perimeter, las structuras politicas, ils dretgs politics, l’organisaziun, las finanzas ed il dretg da planisaziun.
Legitimaziun per discutar davart fusiun
Quella missiva furma la basa per instradar il segund pass nua che las radunanzas communalas dals vitgs en la regiun han da decider sch’ellas vulan dar l’incumbensa a lur suprastanzas da discutar davart ina fusiun pussibla cun las autras vischnancas u betg. Cun questa decisiun na vegniss betg anc decis davart ina fusiun da vischnancas, uschia la conferenza da presidents. I giaja be per in’incumbensa per far scleriments pli profunds.
Involver tuts e tuttas en la discussiun
La lavur da quella gruppa duai vegnir accumpagnada cun in egl critic d’ina gruppa directiva. En quella duain esser represchentadas las gruppaziuns e partidas politicas, la societad da commerzi e mastergn, l’hotellaria, vischnancas burgaisas, deputads dal Cussegl grond sco er collavuraturs en administraziuns communalas.
