Siglir tar il cuntegn

Header

audio
Il tema fusiun è puspè sin maisa
Or da Actualitad dals 26.01.2024. Maletg: Keystone
laschar ir. Durada: 3 minutas 48 Secundas.
cuntegn

Regiun Malögia Fusiun pussibla è puspè sin maisa

La conferenza da presidents da la Regiun Malögia ha decis en sia ultima sesida a portas serradas da vulair lantschar ina discussiun davart las structuras politicas futuras en la regiun. Perquai dovri ina legitimaziun da las radunanzas communalas.

Il gremi proponia da cuntinuar en dus pass, scriva la Regiun Malögia en sia communicaziun. En in emprim pass duai vegnir elavurada ina missiva nua ch’i vegnian scleridas las dumondas fundamentalas. Tar quellas tutgian er dumondas davart il perimeter, pia tgeninas vischnancas duain vegnir tratgas ensemen ad ina vischnanca fusiunada, las structuras politicas, ils dretgs politics, l’organisaziun, las finanzas ed il dretg da planisaziun.

Legitimaziun per discutar davart fusiun

Quella missiva furma la basa per instradar il segund pass nua che las radunanzas communalas dals vitgs en la regiun han da decider sch’ellas vulan dar l’incumbensa a lur suprastanzas da discutar davart ina fusiun pussibla cun las autras vischnancas u betg. Cun questa decisiun na vegniss betg anc decis davart ina fusiun da vischnancas, uschè la Conferenza da presidents. I giaja be per in’incumbensa per far scleriments pli profunds.

Involver tuts e tuttas en la discussiun

Las suprastanzas communalas da las 11 vischnancas duain uss tractar questa proposta en lur gremis. Sche quellas fissan perencletgas cun la procedura preschentada duai vegnir furmada ina gruppa da lavur per elavurar la missiva. La lavur da quella gruppa duai vegnir accumpagnada cun in egl critic d’ina gruppa directiva. En quella duain esser represchentadas las gruppaziuns e partidas politicas, la societad da commerzi e mastergn, l’hotellaria, vischnancas burgaisas, deputads dal Cussegl grond sco er collavuraturs en administraziuns communalas.

RTR novitads 14:00

Artitgels legids il pli savens