La populaziun da Scuol ha ditg cleramain Gea a la sanaziun da la Büvetta a Tarasp ch’è vegnida bajegiada avant 150 onns. Per las lavurs datti in plan da sanaziun.
Deliberar da zona cotschna
Construida tranter En e grippa, sto il monument sco emprim vegnir deliberà da la zona cotschna. La grippa ha da vegnir segirada cun ancras ed a la riva da l'En duai vegnir construì in mir da sustegn. Tar las lavurs èsi impurtant che la funtauna cun ses crap da tschuf na vegn betg periclitada.
Quest crap da tuf è fitg impurtant. El è tipic per las funtaunas d’aua forta e mussa quants minerals ch’igl ha en. Quel sto vegnir mantegnì.
La sanaziun da la Büvetta è in pass pli enavant
Il suveran da Scuol ha ditg Gea a trais propostas areguard la Büvetta a Nairs. Cun circa 72% han ils votants e las votantas dà glisch verda per la sanaziun dal bajetg e la chasa Carola. Plinavant contribuescha la vischnanca 3,7 milliuns francs ad ina nova fundaziun per realisar las mesiras da segirezza en ils conturns e la sanaziun da las funtaunas.
Ils 12 d'avrigl aveva gia la vischnanca burgaisa da Scuol approvà diversas adattaziuns vi dals contracts da dretg da bajegiar en connex cun la Büvetta e la chasa Carola. La vischnanca burgaisa è proprietaria dal terren. En pli ha la vischnanca burgaisa consentì in credit da 300'000 francs a favur da la sanaziun da las funtaunas en la Büvetta.
Nairas uras per sanar la Büvetta
La Büvetta – pli baud in lieu impurtant per turists da cura – stat oz sut protecziun da monuments. Ella tutga tar ils objects istorics ils pli impurtants dal chantun Grischun. Ma la substanza da la Büvetta sa chatta en ina situaziun alarmanta, uschia il giudicat d'experts che han examinà quel avant in onn. Plinavant è l’object periclità causa ch’el sa chatta en in zona cotschna.
Las substanza è ussa ad in punct nua chi fa propi da basegn per mantegnair uschiglio èsi memia tard
Gia dal 2013 è vegnida fundada la Pro Büvetta cun la finamira da vulair proteger il bajetg istoric. Per sanar l’object sco tal ed era ils conturns prevesan ins custs da 18 milliuns francs. Dasper ils 3,7 milliuns che vegnan da la vischnanca, sto la nova fundaziun anc ramassar radund 4,5 milliuns. Sche la fundaziun arriva da garantir ils raps, lura fluescha era il rest tras il chantun e la Confederaziun. La finamira davart dals responsabels è da cumenzar quest’onn cun las emprimas lavurs, e da finir tut il project entaifer quatter enfin tschintg onns.
Fotografias istoricas
-
Bild 1 von 3. La Büvetta – da pli bod ferm visità pervia da l'aua minerala. Bildquelle: Pro Büvetta Tarasp.
-
Bild 2 von 3. Luzius, Bonifazius ed Emerita – las funtaunas da l'aua minerala sa chattian en la Büvetta. Bildquelle: Pro Büvetta Tarasp.
-
Bild 3 von 3. Turisticamain ed era ord motivs da sanadad vegniva la Büvetta frequentada bain. Bildquelle: Pro Büvetta Tarasp.