Suenter che las vischnancas da Zuoz e S-chanf avevan gia approvà l'avust 2021 il concept da la nova societad «Management da Turissem Plaiv», ha er la radunanza communala da Madulain ditg Gea a la collavuraziun intercommunala.
Optimar coordinaziun cun destinaziun
La collavuraziun tar la gestiun turistica dals trais lieus duai vegnir coordinada meglier. Quai surtut tar la spierta digitala e la vendita da products turistics ed er tar il barat cun la destinaziun turistica Engiadina-San Murezzan.
Per la gestiun da la nova organisaziun turistica, fan las trais vischnancas quint cun in budget da 420'000 francs. Ils custs portan ellas tenor scumpartiziun da clav. Cun il Gea da Madulain po la societad uss vegnir fundada ils 10 da november 2021.
Idea betg nova
Las vischnancas da la regiun «La Plaiv» enconuschevan gia ina collavuraziun sin il palc turistic fin avant 10 onns. Quai cun l’organisaziun turistica la Plaiv, curt «TOP Engiadina», nua che La Punt Chamues-ch fascheva er part. Uss na vul la vischnanca betg sa participar ad ina collavuraziun cun las autras trais vischnancas. La Punt s’orienteschia pli ferm vers San Murezzan, uschia il tenor.
