In tun, che dasda era la pli durmantada persuna, suna tar ils commembers dal Salvament da muntogna svizzer. Uss èsi da far svelt, ed ir al lieu da reuniun da la secziun dumandada. Uschia cumenza normalmain in cas serius. Questa giada però, è quest clom in d'exercizi en la secziun d’Engiadina Bassa.
Era per il trenament dovri «situaziun da seracas»
Ina persuna dovra agid. Ella ha fatg ina cupitga en terren stip tranter Ftan ed Ardez, gist sur la via principala. Cun las datas dal telefonin da la persunas disgraziada, ha la centrala pudì localisar ella.
Uss è la maina-acziun dal Salvament alpin da l’Engiadina Bassa londervi. Per l'emprima giada è Alice Vollenweider la responsabla, la uscheditga ELUP. Per quest exercizi èn sa radunads otg commembers, ed Alice Vollenweider als trametta a la tschertgar da la victima. L'emprim team da dus commembers piglia cun sai funcs da lunga e curta distanza, e material per l'emprim agid. Els dus van oravant e dessan dar vinavant las infurmaziuns. Il rest sa fa pront cun dapli material per il salvament, e sa metta era en viadi.
Svelt è cler che la persuna ha rut ina chomma, e na po betg pli sa mover.
In nov sistem per avair infurmaziuns pli precisas
Per Alice Vollenweider èsi il pli impurtant da vegnir infurmada da la situaziun. E qua gida per l'emprima giada in sistem automatic. Vul dir: la glieud ch'ella mobilisescha vegn automaticamain agiuntada en ina gruppa da chat, e po far fotografias e films per avair infurmaziuns pli precisas cun maletgs. E damai che tut è visibel en ils chats, pon era ils salvaders profitar da la savida. In grond avantatg per il salvament.
Bundant tschintg uras per in salvament senza helicopter
Entant è arrivada la maioritad da la colonna da salvament al lieu. Senza suas n’è quai betg pussaivel da cuntanscher la victima. Era Alice Vollenweider è en viadi al lieu, e coordinescha la gruppa da salvament. Dentant han las duas gruppas gia fatg la lavur: la pazienta è pachetada en in satg ch'è montà sin ina purtantina.
Cura che Alice Vollenweider arriva al lieu, èsi da discutar, co ch’ins vul transportar la pazienta giu dal grip e la costa. Quai è bain decis svelt, perquai ch'i dat ina pitschna via da chamutschs ch'è ideala per la portantina.
Privlusa è la crappa. Sche uschè blera glieud lavura en il medem lieu, poi adina capitar ch'in crap sa distatga. Lura poi vegnir privlus. Jau hai era d'avair in egl sin questa situaziun.
Dentant è l'entira gruppa en viadi cun la portantina vers ina senda pli gronda e segira. Dal lieu d’accidaint enfin la senda segira èsi bundant 100 meters d’autezza da far descender cun la suga. Senza gronds problems funcziuna quai, e l’exercizi è a fin.
La bilantscha fitg positiva
Malgrà ch'igl è stada l'emprima giada per Alice Vollenweider sco maina-acziun, ubain ELUP, ha ella gì plaschair che l’exercizi ha funcziunà bain.
Jau sun fitg cuntenta cun il resultat da l’exercizi. Ils salvaders han lavurà bainischem. E quai mussa che nus essan pronts per in cas serius.