Tar sia radunanza communala ha il suveran da Samedan decis da reveder cumplettamain la lescha da construcziun. La lescha da construcziun dal 2005 vegn, tranter auter, adattada a la lescha davart las segundas abitaziuns e, uschè lunsch che pussaivel, a la lescha davart la planisaziun dal territori revedida.
Sanaziun Plazzet – Quadratscha
Plinavant ha il suveran da Samedan dà glisch verda ad in credit da 2,5 milliuns francs per sanar l’infrastructura Plazzet – Quadratscha. Uschia possian las lingias per il provediment d’aua e la dismessa d’aua persa vegnir renovadas, scriva la vischnanca.
Era approvà han las Samedrinas e Samedrins il budget per il 2023. Quel quinta cun in surpli d’expensas da var 2,4 milliuns francs. Il pe da taglia resta tar 85% da la taglia chantunala simpla.