La societad per persunas cun impediments «Movimento» a Samedan avra las portas da sia nova tessaria e butia amez la vischnanca. La midada ha la societad fatg ord mancanza da plazza en las localitads existentas en il vegl ospital a Samedan.
La societad ha pudì cumprar l’entschatta da quest onn las anteriuras localitads da la drogaria Zysset. Quai grazia ad ina donaziun generusa privata, uschia la manadra da l’ufficina a Samedan, Seraina Camichel. Cun la tessaria e la butia ha «Movimento» pudì far midada pass per pass ils ultims mais, suenter avair renovà las localitads.
Lieu d’inscunter
Tras il nov lieu da lavur duai il contact tranter las collavuraturas e collavuraturs da «Movimento» e la populaziun era vegnir intensivà. La vendita dals products che vegnan fatgs a maun saja uss er en in lieu bler pli preschent. Visitaders possian uss gist vesair sez co ch’i vegn tessì. Tut tenor dettia per la stad era la pussaivladad d’installar in pitschen café davant la nova butia da «Movimento», ha declerà la manadra da gestiun.
