Il project ch'è sin maisa per la renovaziun dal eroport a Samedan munta a 68 milliuns francs. 38 milliuns da quel import duain las vischnancas da la regiun Malögia – senza la vischnanca da Bregaglia – surpigliar. Ils raps vegnan pajads or sur sis onns fin l'onn 2031.
La vischnanca da San Murezzan duai tenor questa clav da partiziun surpigliar 39.34% u radund 15 milliuns francs. Supplementarmain duai tenor il concept da finanziaziun da la organisaziun purtadra dal eroport, curt INFRA, San Murezzan dar ina contribuziun speziala en furma d’in credit d’impegn da 5 milliuns francs. Tenor la missiva da l'INFRA profitia San Murezzan surproporziunalmain da l'eroport – e quai perquai pajar 5 milliuns francs dapli.
Ils 5 milliuns francs dattan da discutar
Dad ina vart, uschia ils adversaris, paja la vischnanca gia avunda tenor la clav da repartiziun. Cun ina contribuziun speziala vegniss la gronda part dal suveran da San Murezzan a pajar dapli, senza insumma pudair profitar propi dapli dal eroport. Quai manegia Curdin Schmidt da la PLD, commember dal parlament da San Murezzan.
Igl n'è betg uschia che San Murezzan profita surproporziunal dal eroport a Samedan. Uschia na stuess San Murezzan betg pajar dapli sco che la clav da repartiziun prevesa gia uss.
Da l’autra vart n'haja la vischnanca da San Murezzan betg avunda da dir en relaziun cun la grondezza da l'import che la vischnanca duai pajar al project. Perquai na vul Curdin Schmidt betg sustegnair la proposta.
Il comité «Pro plazza aviatica Samedan» na vesa quai betg usche. Tenor il commember e deputà dal Cussegl Grond, Martin Berthod da la PPS, saja questa contribuziun speziala in segn da solidaritad.
Nossa vischnanca da San Murezzan profita dapli sco las autras vischnancas da la regiun dal eroport a Samedan. Jau ves questa contribuziun speziala sco import da solidaritad envers las vischnancas pli pitschnas en l’Engiadin’Ota.
Plinavant profitia San Murezzan il pli fitg da l'eroport da las vischnancas da l’Engiadin’Ota, numnadamain cun ils giasts ch'arrivan cun eroplans e stan en ils hotels. Ma era las taglias ch'ils possessurs e las possessuras da las villas en vischnanca pajan, sajan impurtantas per San Murezzan.