San Murezzan - Festa da giubileum dal Concours Hippique San Murezzan

Il cumenzament d’avust èn 140 chavals stads en acziun a San Murezzan – per las numerusas occurrenzas da siglir sur obstachels. Il Concours Hippique ha festivà ses giubileum da 30 onns. Avant questa ediziun avevi dà midadas en l'organisaziun.

In team nov e giuven

L’anteriura presidenta dal comité d’organisaziun Ladina Mayer da Bever ha l’onn passà dà giu ses post, per far plaz a la giuventetgna. Tatjana Casagrande da Surlej vuleva ch'igl event da chavals pudess festivar almain ses 30avel giubileum. Perquai ha ella ensemen cun trais autras persunas surpiglià l’organisaziun.

In concurs che stat a cor

Per la giuvna da 23 onns èn ils quatter dis cun las concurrenzas da sigl d’obstachels era ina chaussa persunala. Ella ha pudì far ses emprims pass en il mund da las occurrenzas da chavals sin la plazza San Gian, tranter San Murezzan e Champfèr.

La pli gronda sfida è da chattar sponsurs

Per il comité d’organisaziun è stada la pli gronda sfida da chattar sponsurs per il Concours Hippique San Murezzan. Per quest onn è quai grategià, uschia Tatjana Casagrande. Però na saja betg anc segir sche l’event da sigl d’obstachels possia era vegnì organisà l'onn che vegn.  

Impressiuns dal Concours Hippique San Murezzan