Il Concours Hippique San Murezzan ha adina lieu l’emprima fin d’emna da l’avust, quest onn dals 3 fin als 6 d’avust cun la 28avla ediziun. Il Concours Hippique a Zuoz, il pli vegl turnier da sigl cun chavals envida l’emna suenter a l’occurrenza per la 53avla giada.
Dapi in pèr onns collavuran las duas organisaziuns pli stretg ensemen. Uschia vegn duvrà per exempel ils obstachels da sigl vicendaivel als dus lieus. Singuls voluntaris sustegnan tant l’eveniment a San Murezzan sco er quel a Zuoz.
Il team da giuria, controlladers dal temp ed er ils voluntaris èn sco ina gronda famiglia che sa gida adina puspè a favur dal sport cun chavals en Engiadina.
Per ils blers dals participants e participantas da las duas occurrenzas, signifitga quai da pudair restar en Engiadina cun lur chavals ed il persunal durant duas emnas, senza far gronds viadis.
Sigl «Las duas Ladinas»
Che la collavuraziun funcziuna bain, vegn er mussà cun in sigl al Concours Hippique a San Murezzan. Il premi per quel sigl ha las duas directuras da las occurrenzas, Ladina Meyer-Ratti e Ladina Tarnuzzer, sponsurà – e til numnà tenor lur prenum.