Siglir tar il cuntegn

Header

video
Sche dus hotels da luxus a San Murezzan serran durant la stagiun auta
Or da Telesguard dals 27.01.2021.
laschar ir
cuntegn

San Murezzan Hotel Badrutt's Palace e Carlton serran il manaschi ad interim

A San Murezzan interrumpan dus hotels da luxus la stagiun d'enviern. La raschun è la malsegirezza enturn il virus mutà sco er las restricziuns da viadi. Sch'ils hotels da luxus avran quest enviern anc ina giada las portas, n'è betg enconuschent.

L'hotel Badrutt's Palace a San Murezzan ha decis da serrar il manaschi ad interim. Quai ha il hotel da luxus communitgà. En il hotel han ins chattà avant in'emna plirs cas dal coronavirus mutà. La situaziun da quarantina e l'effect medial haja chaschunà malsegirtads tar ils giasts. Tenor la communicaziun na rendia quai betg da laschar avert las portas. Cura che l'hotel avra puspè, n'è betg enconuschent.

Dasper il Badrutt's Palace avevan ins chattà plirs cas dal virus en l'Hotel Kempinski. Sin fundament da quai aveva il chantun ordinà tests da massa per l'entira populaziun da San Murezzan. Las scolas eran vegnidas serradas.

Reacziun da la vischnanca

Chapientscha per la decisiun da l'hotel Badrutt's Palace mussa Christian Jott Jenny, il president communal da San Murezzan. Hotels en in segment da luxus che vivan per gronda part da giasts internaziunals, hajan actualmain ina dira vita. Cumpensar las sperditas cun giasts svizzers na saja dentant simplamain betg pussaivel. Perquai dovria tenor el en tals cas dapli sustegn finanzial davart il chantun. Ina pretensiun che Christian Jott Jenny ha dal reminent deponì tar il cusseglier guvernativ Christian Rathgeb.

Segund hotel suonda

Suenter l'hotel Badrutt's Palace serra era l'hotel Carlton ad interim. Sin la pagina d'internet da l'hotel da luxus è da leger – che las numerusas restricziuns da viadi impedeschian blers giasts da vegnir en l'Engiadina.

Co i va vinavant e sch'ils hotels da luxus avran anc ina giada quest enviern, n'è betg cler.

RTR novitads 17:00

Artitgels legids il pli savens

Scrollar a sanestra Scrollar a dretga