L’onn 2011 aveva il possessur da l'hotel San Gian a San Murezzan Bogn renovà l’hotel per radund nov milliuns francs. Tar quella renovaziun ha el integrà ils balcuns en la part abitabla da las chombras. Quai n’era betg confurm a la permissiun da construcziun. Suenter ina procedura da permissiun da construcziun posteriura ch’è vegnida refusada ed in Na da la populaziun l’onn 2017 ad ina revisiun parziala dal territori per in engrondiment da l’hotel, ha la vischnanca pretendì dal possessur da l'hotel San Gian da puspè demontar la construcziun enturn ils balcuns da l’hotel.
Dapi lura hai dà differenzas tranter vischnanca ed il possessur da l’hotel. Quel ha numnadamain fatg recurs, tranter auter cunter la revisiun parziala dal territori vischin «Bäderzentrum» – là nua che la nova Clinica Gut duai vegnir construida.
Per chattar ina schliaziun ha il Cussegl communal da San Murezzan approvà in contract da dretg da construcziun a favur da l’hotel San Gian. Uschia duai l’hotel pudair fabritgar parcadis en il territori «Bäderzentrum» e la construcziun dals balcuns da l’hotel San Gian na sto betg vegnir demontada. Il possessur dal Hotel San Gian empermetta da retrair il recurs cunter la revisiun parziala dal territori vischin «Bäderzentrum».
