Siglir tar il cuntegn

Header

cuntegn

San Murezzan Il suveran duai pudair decider davart la nova lescha da turissem

Quai ha il cussegl communal decidì. La lescha è la basa per la nov'organisaziun turistica San Murezzan Turissem.

Ils 31 da mars 2022 aveva il cussegl communal da San Murezzan decidì da sortir da la destinaziun turistica Engiadina San Murezzan Turissem. Per l'onn 2023 è vegnì contractà ina cunvegna da prestaziun per in onn. Per l'onn 2024 vegn San Murezzan dentant a sortir definitivamain. Il cussegl communal da San Murezzan ha perquai tractà la nova lescha da turissem en in'emprima lectura. El ha decidì en quest connex ch'il suveran duai pudair votar davart la lescha.

Ils puncts impurtants

La nova organisaziun turistica San Murezzan Turissem duai vegnir organisada tenor il sboz da la lescha sco societad d'aczias. San Murezzan vegn ad esser l'unica acziunaria. La partiziun da turissem duai damai vegnir distatgada da l'administraziun communala e vegnir depolitisada. Las cumissiuns da turissem e da cultura duain vegnir schliadas. Il chapital d'aczias vegn ad esser 500'00 francs, il preventiv radund 10 milliuns francs. Il cussegl administrativ vegn a sa cumponer da maximalmain nov commembers che resguardan tschertas gruppas d'interess adequatamain.

San Murezzan Turissem vegn a tgirar la marca San Murezzan, che resta dentant en possess da la societad da cura e da traffic. La finamira è da posiziunar San Murezzan sco lieu d'auta qualitad, da prolungar las stagiuns e da regiuvinar la structura da giasts.

Collavuraziun nua ch'i fa segn

La lescha prevesa er che San Murezzan Turissem po far cunvegnas da prestaziuns, per exempel cun la destinaziun turistica da l'Engiadin'Ota. Sco Jürg Schmid, ch'ha cusseglià la vischnanca en chaussa, ha infurmà il cussegl, fetschia senn da collavurar en avegnir per exempel tar la digitalisziun, tar l'infurmaziun da giasts regiunala u tar temas che pertutgan l'entira destinaziun.

Il cussegl communal vegn a leger la lescha ina segunda giada il schaner per lura deliberar la missiva per mauns da la votaziun a l'urna.

audio
Per tadlar: las novitads da las 08:00
ord RTR Audio dals 17.12.2022.
laschar ir. Durada: 6 minutas 46 Secundas.

RTR novitads 06:00

Artitgels legids il pli savens

Scrollar a sanestra Scrollar a dretga