L'onn 2020 aveva la vischnanca da San Murezzan desditg la cunvegna da prestaziun cun la destinaziun turistica Engiadina San Murezzan Turissem sin la fin dal 2022. La finamira era dad elavurar in nov contract pli effizient e pli favuraivel per San Murezzan. Questa primavaira ha il cussegl communal lura decidì da betg pli prolungar la cunvegna e da sortir da la destinaziun turistica.
Uss è cler che la realisaziun da la nova furma da collavuraziun dovra dapli temp che spetgà. Sco il suprastant Martin Berthod ha infurmà il cussegl communal duai perquai l'onn 2023 daventar in onn transitoric. I duai valair la cunvegna actuala levamain adattada, il nov contract duai lura ir en vigur il prim da schaner 2024.
En quest connex ha Martin Berthod er infurmà il parlament da San Murezzan ch'il directur da San Murezzan Turissem, Adrian Ehrbar, haja sa decidì da banunar l'organisaziun sin la fin da quest onn.
Ulteriuras decisiuns
Il cussegl communal ha decidì da scumandar en avegnir fieus artificials, da sustegnair Swiss Olimpic er en avegnir tar il trenament d'autezza, da cuntinuar cun ils livestreams da las sedutas, ha acceptà la cunvegna da prestaziun davart il svilup regiunal ed ha deliberà in credit da stgars 400'000 francs per l'infrastructura da l'Olimpia Bobrun.
