Il november 2023 è vegnida lantschada l’iniziativa. Quella pretenda ch’i vegnia construì en la zona da planisaziun Serletta Sid adequat e correspundent als basegns. Plinavant duess vegnir resguardada l’architectura locala. Per cuntanscher quai, duai la zona da planisaziun vegnir surlavurada.
En la zona Serletta Sid era previs da fabritgar in hotel cun ina clinica, divers recurs han però impedì quest intent. Il 2015 aveva la populaziun gia ina giada consentì ina revisiun da quella zona. Quella revisiun è finalmain rivada al Tribunal federal ch'ha dà glisch verda a la zona revedida.
Cun avair ensemen 400 suttascripziuns, han ils tschintg iniziants ed iniziantas surpassà cleramain il minimum da 200 suttascripziuns necessarias. Sche la vischnanca decida che l'iniziativa saja giuridicamain valabla, avess silsuenter il pievel l'ultim pled en chapitel.