Las consequenzas finanzialas causa la pandemia dal coronavirus n’èn actualmain anc betg survesaivlas. La realisaziun da la chasa da tgira Du Lac ed era la projectaziun da la nova chasa da scola a San Murezzan na duessan perquai betg vegnir interruttas. Uschia la resposta da la vischnanca sin la petiziun inoltrada da Claus Breiner da San Murezzan.
La vischnanca ensemen cun la cumissiun da finanzas sajan permanent vidlonder dad examinar la situaziun finanziala. La perdita d’impostas, la situaziun en il sectur da turissem ed economia vegnian però ad esser visiblas pir en in pèr mais. Lura saja, tenor communicaziun da la vischnanca da San Murezzan, anc temp per agir.
Il petiziunari Klaus Breiner da San Murezzan ha confermà vers RTR ch’el prevesa d’engraziar a la vischnanca per la resposta. Proxims pass politics na prevesa el betg d’inoltrar almain il proxim temp.
