Per l’emprima giada expona Paulin Nuotclà sulet ina schelta da sias ovras ch’el ha creà durant sia vita. Cumenzà cun maletgs, sur caricaturas e comics enfin tar ils tipics sgrafits ves ins en il Château Papillon a San Murezzan extracts da la lavur artistica da l’Engiadinais da 72 onns.
Art che s’è sviluppada
La paletta d’art da Paulin Nuotclà è vasta e s’è sviluppada en pliras fasas, sco ch’il chantautur reflectescha sia vita. Cumenzà cun maletgs gia da mat, sur l’abstracziun enfin en il «pop art». Viver be da quai, na saja dentant betg stà pussibel, perquai ha Paulin Nuotclà lavurà durant sia carriera professiunala faschond surtut sgrafits vi da las fatschadas da las chasas engiadinaisas.
Sch’ins n’ha betg lavur sin ils plazzals da construcziun cun far sgrafits e restauraziuns, n’han ins sco artist indigen nagina existenza, quai è impussibel.
Sairada cun art e musica
Cun ina vernissascha accumpagnada da musica da e cun Paulin Nuotclà, è l’exposiziun vegnida lantschada. In’eveniment per indigens ed era giasts che n’avevan enfin uss betg anc enconuschì l’artist engiadinais. Per Paulin Nuotclà sez signifitga questa pussaivladad da mussar tge ch’el ha creà ils ultims decennis fitg bler.
Jau hai grond plaschair da pudair far in’exposiziun tut sulet, cunquai ch'jau era ils ultims onns adina be ina part da singulas exposiziuns. Perquai è quest per mai sco in nov cumenzament.
Engiadinais en il vitg mundan
Paulin Nuotclà ch'abita en ed è da l’Engiadina Bassa, duai vegnir enconuschent er a giasts e persunas che n’èn betg da lingua rumantscha, uschia la curatura dal Château Papillon, Caroline A. Geist.
En il Château Papillon a San Murezzan vulain nus promover e mussar surtut las lavurs da persunas ch'han ina relaziun cun l’Engiadina. E Paulin Nuotclà è in dals artists che sto exnum far part a quella glista.
Il Château Papillon, la chasa a l’ur da San Murezzan è in lieu d’inscunter per art e cultura cumbinà cun gastronomia. Las organisaturas enturn Caroline A. Geist vulan surtut promover e far enconuschent artists ed artistas da tut gener.
L’exposiziun da Paulin Nuotclà «Ina vita» è averta mintgamai da gievgia fin sonda da las 14:00 – 18:00 enfin l’avrigl.
Or da l'archiv:
