Regula Cadalbert da l'Allianza dal Center è vegnida elegida en il segund scrutini en il cussegl communal da San Murezzan. Ella ha ramassà 402 da las 848 vuschs valaivlas. Adrian Ehrbar da la Partida liberaldemocratica è vegnì sin 340 vuschs e Moreno Triulzi da la Partida populara svizra ha survegì 106 vuschs. En il segund scrutini è la persuna cun las pli bleras vuschs elegida.
Nagin pli absolut il mars
Tar l'elecziun dals 3 da mars n'ha nagin dals candidats cuntanschì il pli absolut necessari da 485 vuschs.
- Regula Cadalbert, AdC, 400 vuschs
- Adrian Ehrbar, PLD, 302 vuschs
- Moreno Triulzi, PPS, 155 vuschs
- Richard Dillier, Next Generation, 111 vuschs
Il cussegl communal a San Murezzan consista da 17 commembers e commembras. Cun la partenza da Loris Moser, che aveva fatg part dal gremi pir il schaner da l’onn passà, han ils electurs e las electuras da San Murezzan stuì eleger in nov u ina nova persuna per la plazza vacanta.
