Siglir tar il cuntegn

Header

audio
Project Serletta Sid daventa in cas per il tribunal federal
Or da Actualitad dals 06.02.2020.
laschar ir. Durada: 03:08 minutas.
cuntegn

San Murezzan Serletta Sid fatschenta uss il Tribunal federal

Per la Clinica Gut e l'hotel da sanadad planisà daventi adina pli stretg, ma dar si Serletta Sid n'è anc nagina opziun.

Suenter che la Dretgira administrativa dal Grischun aveva refusà il december in recurs dals hotels Kulm e Badrutt's Palace ston uss ils derschaders a Losanna decider en chaussa. Ils hoteliers sa disturban en emprima lingia vi dal volumen da l'edifizi planisà. Els crititgeschan dentant era che principis da planisaziun e dretgs d'ecologia na sajan betg vegnids resguardads.

Jörg Röthlisberger, pledader dal hotel Kulm, ha declerà envers RTR, che l'hotel fiss tuttina pront da chattar ina soluziun constructiva.

Quai dovra dentant temp, perquai avain nus stuì trar enavant il recurs a Losanna.
Autur: Jörg RöthlisbergerPledader hotel Kulm

Adrian Urfer, delegà dal cussegl administrativ da la Clinica Gut n'è betg persvas da la prontadad da discussiunar.

Nus eran en discussiun la primavaira passada ed avain uss puspè empruvà da vegnir en discussiun, ma la prontadad n'è simplamain betg avant maun.
Autur: Adrian UrferDelegà dal cussegl administrativ da la Clinica Gut

Per la Clinica Gut vegni cun quest pass adina pli difficil da realisar sia nova clinica sin l'areal Serletta Sid. Cunquai ch'il contract da fittanza scada l'onn 2023 dovra ella fin lura ina nova soluziun. Perquai lavuran ils responsabels enturn Adrian Urfer vi dad alternativas a San Murezzan Bagn, Silvaplauna u Samedan. Dal tut dar si na vul Urfer Serletta Sid dentant anc betg.

Cler è ch'in hotel da sanadad pudess mo vegnir realisà a Serletta Sid, ils auters lieus na porschan betg avunda plazza.

Ord l'archiv:

Il project Serletta Sid è gia dapi plirs onns en discussiun. Il project è uschia er gia vegnì surlavurà il 2016.

video
Surlavurà project per in center da sanadad Serletta a San Murezzan
Or da Telesguard dals 22.12.2016.
laschar ir

RTR novitads 06:00

Artitgels legids il pli savens

Scrollar a sanestra Scrollar a dretga