Las abitantas ed abitants da la vischnanca da San Murezzan duessan pudair vuschar anc ina giada tge che capita cun la zona «Serletta Sid» a San Murezzan.
Il cusseglier communal da San Murezzan Gian Andrea Conrad dal parti popular svizzer pretenda da la suprastanza communala da sistir la dumonda da fabrica da la Chris Silber SA, plinavant era da sistir tut las proceduras pendentas giuridicas davant il Tribunal federal.
Gian Andrea Conrad ha argumentà, en occasiun da la sesida dal parlament communal da San Murezzan, che in quella zona era oriundamain previs la Clinica Gut. Quella ha entant fabritgà a San Murezzan Bogn in nov edifizi. Il niz da la zona saja perquai sa midada fundamentalmain, uschè Conrad. El pretenda perquai da la vischnanca da legalisar per immediat l’iniziativa inoltrada avant radund trais mais nua che radund 400 abitantas ed abitants avevan suttascrit.
La vischnanca da San Murezzan ha infurmà che la suprastanza vegnia a tractar l’iniziativa probablamain la fin dal mais da matg.
