Siglir tar il cuntegn

Engiadina San Murezzan: Taglià la corda cun sgular memia bass

L'incident era capità tar ina show acrobatica da la squadra PC-7. Uss è vegnida la giustia militara a la conclusiun, ch'il aviun saja probablamain sgulà memia bass. Quai communitgescha la giustia militara il mardi a las medias.

La zona d'arrivada ils 17 da favrer 2017 curt suenter l'incident.
Legenda: La zona d'arrivada ils 17 da favrer 2017 curt suenter l'incident sin ina foto da SRF Sport. SRF Sport

En ses communitgà declera la giustia militara il mardi tgeninas ch'i sajan stadas «probablamain» las raschuns per l'incident.

Sgulà memia bass e memia malsegir

La giustia militara concluda ch'il manader da la squadra PC-7 haja tschernì en sia planisaziun da la show d'acrobatica aviatica in'autezza minimala memia bassa. En pli na saja betg vegnida calculada la marscha da segirezza necessaria tar la camera pendenta, schebain che tut las datas sajan stadas enconuschentas. Qua na sajan n'er las indicaziuns en il manual militar correspundent cleras avunda.

Inquisiziun preliminara cunter manader da squadra e pilot

Perquai pretenda il derschader d'inquisiziun militar dad instradar in'inquisiziun preliminara cunter il manader dal team. Al medem mument duai er vegnì examinà, sch'il pilot n'haja betg sa cuntegnì tenor prescripziun.

L'aviun aveva taglià la corda dad ina camera pendenta

Igl era succedì ils 17 da favrer 2017 durant il campiunadi mundial da skis a San Murezzan: Durant ina show d'acrobatica aveva in'aviun da la squadra acrobatica PC-7 strivlà ina camera pendenta sur l'areal d'arrivada. La camera era crudada perquai giu davant la tribuna dals aspectaturs. Blessads n'avevi dà nagins. Al pilot eri reussì da sgular anc enfin a Samedan e dad atterrar là.

L'incident haja causà in donn da 75'000 francs vi da l'aviun ed in da plirs tschientmilli francs vi da l'indriz da camera, la camera sez ed ina sutgera en vischinanza, enumerescha il communitgà.

RR novitads 10:00