Siglir tar il cuntegn

Header

Navigaziun

Legenda: Guardar il video Idea da «Monaco en las Alps» sto anc surmuntar obstachels. Durada 03:22 minutas.
Or da Telesguard dals 28.06.2019.
cuntegn

Engiadina San Murezzan vul daventar il «Monaco da las Alps»

Suenter Turitg e Berna duai l'onn proxim avair lieu ina cursa da furmla E a San Murezzan. La suprastanza ha decis da curt da dar ina decleraziun d'intenziun. In'idea che dat da discutar.

San Murezzan haja mussà ils davos 150 onns adina puspè ch'il lieu turistic saja in pionier. L'emprima glisch electrica, l'invenziun dal turissem d'enviern, pertge damai betg organisar l'emprima cursa da furmla E en las muntognas? Quai di il president communal Christian Jott Jenny.

San Murezzan fiss ina sort dad in simpatic «Monaco da las alps».
Autur: Christian Jott JennyPresident communal San Murezzan

La vischnanca saja pronta da sustegnair l'organisatur tar la planisaziun e la realisaziun dad ina cursa pussaivla. Sco citad d'energia saja en il senn da San Murezzan da tematisar la mobilitad d'electro.

San Murezzan ha ina gronda affinitad per il sport da motor ed organisescha mintg'onn in tozzel events d'automobil.
Autur: Christian Jott Jennypresident communal

In E-Prix il fanadur 2020 lantschass perfetgamain la stagiun da stad – da quest temp na marschia anc betg bler a San Murezzan, uschia il president communal Christian Jott Jenny.

I dat dentant era dubis, surtut tge che pertutga la persistenza, las dimensiuns ni l'aspect ecologic d'in tal event. E bleras dumondas sajan anc avertas, tranter auter quella da la ruta ni quella da las lubientschas. Talas duvrassi numnadamain betg mo da la vischnanca, mabain era da differents uffizis chantunals e tut tenor era da privats.

Responsabels han plaschair

Ils responsabels svizzers da la furmla E hajan plaschair da l'interess. Vegnia quel concretisà, pudessi dar in partenadi a lunga vista, è il schef da Swiss E-Prix Operations persvas. La societad ha ils dretgs per las cursas da furmla E en Svizra.

Tge è la furmla E?

La furmla E è ina seria d'autos da cursa nua che be autos cun in motor electric sa participeschan. L'emprima stagiun è stada il 2014. Actualmain sa participeschan a las cursas 11 teams cun 22 pilots – intgins da quels èn anteriurs pilots da la furmla 1.

RR novitads 15:00