Siglir tar il cuntegn

Header

audio
Ospital Samedan cun sfidas finanzialas
Or da Actualitad dals 13.01.2024. Maletg: RTR
laschar ir. Durada: 3 minutas 10 Secundas.
cuntegn

Sanadad Engiadin'Ota Las sfidas finanzialas da l'ospital a Samedan

Las vischnancas da l’Engiadin’Ota han approvà la cunvegna da prestaziun cun la fundaziun dal provediment da sanadad Engiadin’Ota. I va per la gestiun da las chasas d’attempads Promulins a Samedan e Du Lac a San Murezzan ch'avra sias portas l'onn che vegn. La cunvegna da prestaziun vala per 4 onns enfin il 2027. La fundaziun dal provediment da sanadad è l’organisaziun tetgala da las instituziuns dal servetsch sanitar sco l’ospital, la Spitex e las chasas d’attempads en l'Engiadin’Ota.

Sco quai che la gasetta Engadiner Post scriva - sa referind ad ina communicaziun da la fundaziun dal provediment da sanadad Engiadin'Ota, saja la collavuraziun da fin qua sa cumprovada. Ella segireschia che l'Engiadin'Ota disponia en il futur d'ina purschida che correspundia als basegns quai che pertutga pussaivladas d'abitar e da tgira. Els sa legrian perquai che las vischnancas e la fundaziun hajan prolungà la cunvegna da prestaziun, citescha la gasetta il president dal cussegl d'administraziun Gian A. Melcher.

Tgira integrada vegn bajegiada ora

Las prestaziuns da la fundaziun dal provediment da sanadad Engiadin'Ota èn en stretga collavuraziun cun la tgira acuta en l'ospital, cun la Spitex ed ulteriurs servetschs da sanadad en la vallada. La tgira integrada na saja perquai betg be in pled vid, mabain ina realitad en il mintgadi, uschia Melcher.

Davent da l'onn 2024 vegn il provediment integrà schlargià: Ils servetschs psichiatrics dal chantun Grischun èn sa cunvegnids cun ils responsabels da l'Ospital Engiadin'Ota, da tansferir ils posts dal center da psichiatria Engiadina/Grischun dal Sid a Samedan. La finamira da quest pass è da nizzegiar meglier sinergias e da meglierar il provediment psichiatric.

Da vart finanziala ha l'Ospital Engiadin'Ota entant da cumbatter cun grondas sfidas structuralas, sco quai ch'igl è da leger en la communicaziun. L'onn da fatschenta 2023 ha l'ospital fatg ina perdita operativa ed era per l'onn current quinta l'ospital cun in deficit. Tenor Gian A. Melcher chaschunan l'inflaziun, ils pretschs d'energia che creschan e la mancanza da persunal custs pli auts. Sco blers auters ospitals svizzers pattescha era l'Ospital Engiadin'Ota da sfidas structuralas. La finanziaziun ord agens meds vegn perquai pli e pli difficila sche betg schinzunt nunpussaivla. Per la fundaziun dal provediment da sanadad Engiadin'Ota munta quai ch'ella vegn a stuair discurrer cun las vischnancas purtadras davart il futur da l'Ospital Engiadin'Ota. Sper la finanziaziun, stoppia la fundaziun era examinar a moda critica sia purschida da prestaziuns.

RTR novitads 12:00

Artitgels legids il pli savens