Ils 4 da november ha la populaziun d’Engiadin’Ota refusà la nova cunvegna da prestaziun per la Fundaziun provediment da sanadad d’Engiadin’Ota (SGO) ch'è era responsabla per la gestiun da l’ospital regiunal a Samedan.
Sut il tetg da la SGO èn sper l’ospital era las duas chasas da tgira e la Spitex. Las vischnancas da la Regiun Malögia èn dentant obliadas da collavurar per segirar il provediment da sanadad.
Il plan da sanaziun da la SGO prevesa, che la gestiun da las duas chasas da tgira e la Spitex vegnian transferidas surpurtadas en ina nova societad da salvament. Quella duai esser ina societad da dretg public e garantir ina cuntinuaziun da las gestiuns. Per savair fundar la societad dovri il consentiment da tut las 11 vischnancas, che vegnan ad avair decis enfin ils 8 da mars 2026.
Cunquai che la liquiditad da la SGO vegn ad esser a fin suenter l’emprim quartal dal 2026, avessan las duas chasas da tgira e la Spitex dentant dad esser transmidadas il pli tard il prim d’avrigl 2026 en ina nova organisaziun. Las lavurs per instradar quella, duain cumenzar il pli tard cumenzament da december, uschia la presidenta da la SGO, Selina Nicolay envers RTR.
Per savair agir immediat (e betg pir suenter la votaziun dals 8 da mars 2026) duai vegnir fundada ina societad simpla tras las vischnancas purtadras cun in budget total da 430'000 francs. Actualmain sajan las suprastanzas communalas vi da decider davart ils imports tenor scumpartiziun da clav, uschia Nicolay.