La presidenta communala da Scuol, Aita Zanetti ha reactivà in’usanza antica en sia patria, a Sent. La festa da «Cuvits», nua ch’il capo, la suprastanza communala, il cussegl da scola e la cumissiun sindicatura vegnan saramentads.
Ceremonia cun musica e pop da naiv
Per la festa da «Cuvits» preparan uffants e giuvenils dal lieu ina tur da glatsch da var 3-4 meters autezza. Sisum quella in pop da naiv. Durant l’act festiv, accumpagnà da la societad da musica, e suenter la stgisa dal president partent, cupitgan ils uffants il pop da naiv – simbolic per l’èra che va a fin.
Suenter la saramentaziun da las autoritads communalas, ed ina festina cun vin chaud, èn quellas pia installadas e pon cumenzar culla lavur.
Tradiziun era periclitada
Tras la fusiun da la vischnanca da Scuol era l’usanza, ch’è vegnida festivada pli baud a Sent ed a Guarda, periclitada. Sin giavisch dad Aita Zanetti, hajan ins decis da far la festa, cun adattar quella.
Tradiziuns han da vegnir mantegnidas e vividas. Ins sto però avair il curaschi d’adattar ellas. Oz avain fatg quai cun far la saramentaziun a Sent e betg a Scuol.
Ensemen cun la populaziun da la vischnanca da Scuol ha il president partent, Christian Fanzun prendì stgisa e la presidenta communala, Aita Zanetti e las autoritads communalas èn vegnidas saramentadas.
Dapli tradiziun da l'Engiadina:
