Schlarigna - Nova planisaziun locala malgrà diminuziun da populaziun

Radund 100 abitants ed abitantas eran preschentas en la sala da scola a Schlarigna. La vischnanca ha envidà ad ina sairada d’infurmaziun, per preschentar la versiun finala da la planisaziun locala.

Sairada d'infurmaziuns a Schlarigna

Pli paucs abitants, pli pac terren da fabrica

Cun las reglas e leschas federalas e chantunalas duain bleras vischnancas en il Grischun surlavurar lur atgnas leschas da construcziun ed era la planisaziun dals vitgs. Il chantun Grischun stima per mintga vischnanca sche quella ha dapli u damain abitants ed abitantas en 15 onns. Sche ina vischnanca crescha po quella era avair dapli terren da construcziun. En cas da Schlarigna però, nua ch'il chantun stima che la populaziun va enavos, datti pli pauc terren da construcziun.

Co far la planisaziun?

Avant nov onns ha la vischnanca cumenzà cun il project. Differents obstachels eran sin via, per exempel da chattar en la vischnanca terren da construcziun, da definir zonas da mastergn e per la hotellaria. Ma er co che la vischnanca duai vegnir pli abitabla, cun zonas verdas, parcadis centrals e cun quai in nov concept da traffic.

Cun las emprimas ideas e plans è vegnida dumandada la populaziun dad inoltrar lur ponderaziuns en chaussa. Suenter è l'entir dossier vegnì inoltrà al chantun per ina examinaziun preliminara. Quella ha purtà scuvertas ch’èn vegnids pigliadas en la planisaziun. En in proxim pass èn per ina segunda giada vegnids dumandads ils abitants ed abitantas. Uschia è la planisaziun madirada pass per pass e vegnida preschentada a la populaziun.

Fatg il fundamaint per il svilup

Suenter uschè blers onns ha il president communal Christian Brantschen pudì preschentar la planisaziun locala.

Il suveran da Schlarigna duai cun questas infurmaziuns, era accessiblas sin la pagina d’internet da la vischnanca, decider ils 20 october en chaussa.