25 uffants tranter 9 e 17 onns da la scola da pedagogia curativa Sonnenberg a Baar en il chantun Zug han passentà la mitad schaner in'emna da skis en l'Engiadin'Ota. Tut ils uffants e giuvenils han in handicap da la vesida e per part era ulteriurs impediments. Mintgina e mintgin dad els ha passentà l'emna cun in agen magister ni in atgna magistra da skis cun ina scolaziun speziala per instruir persunas tschorvas ni cun in handicap da la vesida.
Gronda responsabladad
Per ils magisters e las magistras è la responsabladad pli gronda sch'els èn en viadi cun uffants che na vesan insumma betg ni betg bain. Els stoppian adina avair en egl lur scolaras e prevesair la situaziun. Quai procuria per dis intensivs, manegia per exempel la magistra da skis Sina Conrad, e funcziunia mo sch'ins saja fit la damaun. Il collega Joel Jenny agiunta ch'ils scolars dovrian dapli sustegn ch'uffants senza handicap e ch'ins stoppia perquai guardar pli fitg sin e per els.
Tuttina saja quai per ils magisters e las magistras fitg bel da pudair far part da quest emna. I saja bel da pudair pussibilitar als uffants in'emna sin las pistas engiadinaisas malgrà lur handicaps.
Mintgin en ses tempo
Cunquai che mintga uffant ha ses agen magister ha era mintg'uffant la pussaivladad d'emprender ad ir culs skis ni cun l'aissa en ses agen tempo. Ils ins stattan numnadamain l'emprima giada insumma sin skis, sco Kusai. Auters van già plirs onns cun skis, sco Lenny, e passentan ils dis perquai si Marguns en il territori da skis. Temma n'han ils uffants betg, forsa in zic respect. Per exempel Jana, dentant betg pervia da l'ir cun l'assa, plitost pervia dal sulegl che fa mal a ses egls.
La sfida per las magistras saja perquai era dad ir en sin lur scolars. E d'adattar adina puspè lur program. Per che tuts – magisters e scolaras – possian passentar ina bell'emna da skis ensemen.
