Uss è cler, tge ch'il suveran vul: L'iniziativa «La scola duai restar en vitg» ha chattà ina maioritad da 60 % da las vuschs a San Murezzan. Uschia duai uss vegnir midà la lescha da scola cun ina simpla frasa. Il stgalim aut resta a San Murezzan. In resultat, che satisfa a la co-inizianta Esther Pfäffli.
Quest è in cler signal cunter l'idea da la gronda part dal parlament e la suprastanza da San Murezzan.
Da tschella vart chatta la suprastanta da San Murezzan, Prisca Anand, putgà, dad esser uss sfurzà da betg pudair lavurar vinavant al project per in stgalim aut fusiunà a Samedan. Ella chatta donn, pervi ch'ins n'haja betg pudì preschentar ils resultads da la gruppa da lavur da la regiun Malögia e mussar, tge effects positivs ch’in stgalim aut a Samedan pudess avair.
Jau chatt quai donn.
Dentant n’è betg cler, co ch'il futur da tut la scola a San Murezzan duai guardar ora. La vischnanca duai uss ir sur ils cudeschs, e far in plan co vinavant. Tenor Prisca Anand duai er il project d’in stgalim aut fusiunà a Samedan ir vinavant. Quai cun il rest da las vischnancas da la regiun Malögia, pero senza San Murezzan.
5-12-25
L'iniziativa «La scola duai restar en il vitg» a San Murezzan pretenda ch'il stgalim aut duai restar en vischnanca. Quai cun in sguard sin ils plans da la regiun Malögia da centralisar ils stgalims auts da Segl fin Bever en in lieu.
Samedan sco lieu vegn favorisà
Ils plans per centralisar èn per il mument en ina fasa da consultaziun. In rapport da las retschertgas d’ina gruppa da project è vegnì elavurà, e duai vegnir publitgà al principi da l'onn proxim, cun er avair valità il lieu per ina tala nova scola.
Tenor Prisca Anand, suprastanta da San Murezzan e commembra da la gruppa da project da la regiun Malögia, sajan ins da l'opiniun che Samedan saja il lieu ideal per ina nova chasa da scola per ils vitgs da Segl fin Bever.
L'iniziativa «La scola resta a San Murezzan»
L’iniziativa vul tenor la co-inizianta Esther Pfäffli ch'il stgalim aut na po betg ir davent da San Murezzan.
Quai er pervia ch'ils iniziants e las iniziantas enturn Esther Pfäffli na vulessan betg ch'ils circa 100 scolars e scolaras dal stgalim aut duain ir or dal vitg per ir a scola.
Nus na vesain betg il basegn che noss scolars e scolaras duajan ir a Samedan a scola.
Tut quai che in stgalim aut fusiunà po porscher, po era vegnir purschì da San Murezzan.
La cunterproposta dal parlament da San Murezzan
Per Prisca Anand sa serra dentant uschia la porta per ina pussaivla fusiun dals stgalims auts, sco che la regiun Malögia planisescha. La cunterproposta dal parlament da San Murezzan vul permetter quai. Ella prevesa che las scolinas e la scola primara restan a San Murezzan, dentant ch'i duaja esser pussaivel da metter ensemen ils stgalims auts da Segl fin Bever.
I fiss putgà sch'ins bloccass la via per San Murezzan da sa participar en il project da fusiun dals stgalims auts en l’Engiadin’Ota.
Uss èn dumandads ils votants e las votantas da San Murezzan per decider a l’urna ils 14 da december, co che ina scola duai vesair ora en l’avegnir