Perquai ch'ils bajetgs vegls n'adempleschan betg pli ils standards ed èn vegnids vegls, aveva la vischnanca da Scuol lantschà ina concurrenza publica d'architectura. Gudagnà quella aveva in project d'architects da Turitg. Sut il titel «Scola Scuol+» aveva la vischnanca previs d'investir radund 35 milliuns francs. L'argument da lez temp era, che las localitads da la scola sajan memia veglias e ch'i dovria dapli plaz per las scolaras ed ils scolars.
Tut quai na vegn uss, dus onns pli tard, dentant betg realisà. Il motiv principal: Il project saja memia char. Aita Zanetti, la presidenta communala da Scuol declera, ch'il bajetg vegl da la scola actuala saja anc adina vegl e dovria urgentamain sanaziuns. Cun quai ch'il project «Scola Scuol+» haja previs da vinavant utilisar er il bajetg vegl da la scola, plus construir novas chasas, saja quel project uss massa grond.
Al cumenzament dal project era il dumber d'uffants anc fitg aut, uss è la cifra da naschientschas sa diminuida marcantamain.
In ulteriur argument che la presidenta communala menziuna, è che la cifra da las scolaras ed ils scolars è sa diminuida marcantamain. Durant la fasa da planisaziun dal project «Scola Scuol+» saja il dumber dals uffants anc ì ensi. Oz vesia la situaziun ora tut auter.
La finamira saja ussa da surlavurar il concept da las localitads, previsa è anc adina la sanaziun da la scola existenta che fetschia grond basegn. Tenor Aita Zanetti na saja la situaziun finanziala betg precara, ma la vischnanca da Scuol haja divers projects che stoppian vegnir realisads. La finamira saja, tenor che finanziaziuns sajan surtut persistentas.