Las elecziuns communalas a Scuol per la perioda d’uffizi 2027 – 2030 han lieu l'october durant las vacanzas d’atun. Per il solit vegnan quellas organisadas al termin da votaziun federal da l'atun, quai fiss quest onn ils 27 da settember. Ma pervi d'ina divergenza tranter la constituziun communala e las modalitads dad e-voting n'èsi betg pussaivel da far las elecziuns communalas per quest termin.
A Scuol stuessan quest atun vegnir occupads almain trais sezs en la suprastanza communala, in en il cussegl da scola e tuts tschintg en la cumissiun sindicala cun novas represchentantas u represchentants. Quai pervi da diversas demissiuns: En la suprastanza communala han decidì Seraina Guler da Sent, Iwan Damerow da Tarasp e Fadri Häfner da Guarda da betg pli candidar per la perioda d’uffizi 2027 - 2030.
Fadri Häfner sa retira il medem mument er dal cussegl da scola. E da la cumissiun sindicala da Scuol demissiuneschan gist tut las commembras e commembers: Katharina Gericke, Flurin Marugg, Riet à Porta, Chasper Sarott e Marianne Werro.
La constituziun communala na prescriva betg, fin cura che persunas pitschnas pon annunziar ina candidatura. Principialmain èsi perquai pussaivel d'inoltrar candidaturas en scrit per ils sezs vacants fin il di d’elecziun tar la vischnanca. E quel termin d'elecziun è questa giada pli tard che usità, apunta pervi dal dretg d'inoltrar candidaturas fin l'ultim mument.
Nagin e-voting tar l’elecziun communala
Per il solit han las elecziuns communalas lieu il termin da votaziuns federalas da l’atun, quel è quest onn ils 27 da settember. Tar quest termin, cura ch'i vegn decidì davart l'iniziativa federala da neutralitad, l'iniziativa federala d'alimentaziun e davart il dretg chantunal da votar cun 16 onns, pon las votantas ed ils votants da Scuol votar er electronicamain cun il sistem dad e-voting, sch'els èn s'annunziads per quest sistem.
L’urna da votaziun electronica avra tenor las directivas dal chantun quatter emnas avant il termin, per las votaziuns dals 27 da settember. Ins po pia dar giu sia vusch digitala gia a partir dals 31 d'avust. Questa durada da votar electronicamain n'è betg cumpatibla cun il sistem d’elecziun etablì a Scuol, perquai ch'ins na po betg pli inoltrar ulteriuras candidaturas en il sistem actual dad e-voting ina giada che l’urna digitala è averta.
En in tschert senn è quest sistem dad e-voting pia main flexibel che quel analog cun cedels da votar, urnas da lain e scrutinaders da pel ed ossa. E perquai na po l'elecziun communala betg avair lieu al termin federal dals 27 da settember.
Elecziun durant las vacanzas
Uschia ha la vischnanca da Scuol decidì che las elecziuns communalas han lieu ils 18 d'october 2026 e senza pussaivladad dad e-voting. «Quai è il termin il pli baud pussaivel, senza ch'i circuleschan il medem mument ils documents per dus differents termins da votaziun», declera la chanzlista Karin Stecher.
Cun quai ha l'elecziun communala dentant lieu amez las vacanzas d'atun. Sche quest termin insolit ha in’influenza sin la participaziun, vegni a sa vesair lura. Avant quatter onns, cura che las autoritads communalas eran vegnidas elegidas ils 25 da settember, avevan dà giu bunamain 60% dal suveran lur vusch. Ina quota marcantamain pli auta che en la media svizra da quel di.
Raschuns persunalas per las demissiuns
Cun Seraina Guler ed Iwan Damerow demissiuneschan en la suprastanza communala da Scuol quella e quel ch'èn stads il pli pauc ditg en uffizi. Omadus eran vegnids elegids avant bundant dus onns en in'elecziun substitutiva. «Igl è memia bler», di Iwan Damerow che lavura en in pensum da 80% sco magister da religiun ed ha vitiers anc in affar da pictur. «Sautar sin trais nozzas na va betg», constatescha el. Seraina Guler n'è betg stada cuntanschibla per quest artitgel.
Fadri Häfner è dapi il 2019 en uffizi e fa er valair motivs persunals e professiunals per sia decisiun: «Jau sun engaschà 100% professiunalmain e m’engascha dasperas sco predicatur laic. Er mia famiglia duai en l'avegnir puspè survegnir dapli temp», scriva il responsabel dal departament da scola, fatgs socials e sanadad, agiuntond ch'el guarda enavos cun renconuschientscha sin ils otg onns passads e la buna collavuraziun.
Sumegliant tuna en la cumissiun sindicala, en la quala demissiuneschan gist tut las commembras e commembers – er là per motivs privats e da professiun, sco Riet à Porta di: «Igl è ina casualitad che demissiunescha gist l'entir gremi. Tuts han motivs persunals per questa decisiun.» La collavuraziun en il gremi sez haja funcziunà fitg bain. Er la collavuraziun cun la vischnanca haja funcziunà per gronda part bain, en tscherts puncts saja dentant anc avant maun potenzial d'optimaziun, di il president da la cumissiun sindicala.
Entant naginas novas candidaturas
Actualmain sa mettan a Scuol a disposiziun mo diesch candidatas e candidats ch'èn gia en uffizi per ils totalmain 19 posts che stuessan vegnir occupads en las elecziuns – quel dal president ed ils ulteriurs sis en la suprastanza communala, set en il cussegl da scola e tschintg en la cumissiun sindicala. Ulteriuras candidaturas n'èn fin uss betg vegnidas annunziadas a la vischnanca – u n'èn fin uss almain anc betg vegnidas communitgadas publicamain.
«Mintga candidatura inoltrada en scrit vegn publitgada il pli tard il proxim di da lavur sin la pagina d'internet da la vischnanca», stat scrit en quest connex en la constituziun da la vischnanca da Scuol. Tant en la suprastanza communala sco er en il cussegl da scola ha tenor constituziun vairamain mintga anteriura vischnanca il dretg da dar ina represchentanza en il gremi, pia Guarda, Ardez, Ftan, Tarasp, Scuol e Sent.
Ma actualmain mancan per la suprastanza communala anc candidaturas che represchentassan las fracziuns da Guarda, Tarasp e Sent e per il cussegl da scola insatgi da Guarda.