Dapi 4 onns èsi cler ch'ins vul bajegiar sur Scuol a l’ur dal territori da skis Motta Naluns in implant fotovoltaic: la Scuol Solar. Uss ha quel fatg in pass enavant. Ils responsabels e responsablas enturn il parsura Chasper Alexander Felix han inoltrà il permiss da construcziun al chantun Grischun. Quai cun midaments da la grondezza da l'implant planisà.
Dimensiuns pli pitschnas
Sin radund 12 hectaras duain ils panels solars vegnir installads. Atgnamain era previs che Scuol Solar haja ina surfatscha da 77 hectaras. Però è suenter quatter pass da diminuziun s'empitschnida la surfatscha per l’implant.
Quai ha gì da far cun la protecziun da l’ambient e natira. En il lieu planisà èn da chasa lodolas ch'èn protegidas. Per duvrar uss la surfatscha avess la Scuol Solar stuì cumpensar quellas cun autras surfatschas.
Per mai èsi donn che nus na pudain betg bajegiar uschè grond sco che nus avessan vulì.
Tenor Chasper Alexander Felix saja quai en la regiun da l’Engiadina Bassa fitg grev, quella ha gia fitg bleras surfatschas protegidas.
Pli pitschen è era pli bunmartgà
Cun la surfatscha pli pitschna possian ins uss era desister sin grondas investiziuns en l’infrastructura da la forza electrica. Per exempel n’èsi betg necessari da bajegiar ina lingia da current ferm da l’implant giu en val. Qua basta la lingia dal territori da skis per che l’implant po vegnir collià a la rait da forza electrica.
Tenor ils plans da la Scuol Solar vegnia l'implant a custar circa 50 milliuns francs. Ina emprima prima part duai producir forza electrica a partir dal 2028.