Suenter che la populaziun da Scuol aveva ditg cun 52% Gea a l’idea da Scuol Solar si «Sur Bos-cha», ha la gruppa enturn Chasper Alexander Felix lavurà davos las culissas vi dal project. La dumonda da construcziun è però anc adina pendenta tar il chantun. La raschun n'è nagut tecnic mabain las mesiras da cumpensaziun.
Per realisar il project en la varianta actuala cun 46 hectaras ed ina prestaziun da bun 40 uras gigawatt pretendan las leschas actualas mesiras da cumpensaziun en la dimensiun da 1,4 milliuns francs. Quai èn mesiras sco renaturalisaziuns, refar palids, tgirar cuntradas creschidas en euv. Ma tenor il manader da la gruppa da project Chasper Alexander Felix, n'èsi strusch pussaivel da chattar en l'Engiadina Bassa avunda pussaivladads per realisar questas mesiras. Perquai che la gronda part da la regiun saja gia terren protegì, abitadis ubain crappa u grippa.
La consequenza è ch'il project sto vegnir redimensiunà in'ulteriura giada e ch'i dat ina quarta varianta. Quella daventa anc pli pitschna cun anc pli pauca prestaziun.
Pli pitschen, ma rentabel – quai era ed è anc adina la devisa
Tar las ultimas adattaziuns dal project gievi tranter auter per dumondas da la geologia, sco ch’il manader dal project ha declerà lezza giada. Questa vai pia per las mesiras da cumpensaziun. I giaja ussa per tschertgar ina varianta tranter la grondezza planisada actualmain (46 hectaras e 40 uras gigawatt) e la grondezza minimala che la Confederaziun prescriva. Quella è tar ina prestaziun da 10 uras gigawatt.
Insatge tranter quai che nus avain planisà ussa e la grondezza minimala, la stuain nus tschertgar nua ch'il punct optimal è er per la finanziaziun.
Uschia vegnia er la dimensiun da mesiras da cumpensaziun pli pitschna e la schanza da chattar avunda pussaivladads per realisar quellas mesiras saja plitost dada, di Chasper Alexander Felix. Cifras exactas per la quarta varianta dal project na datti anc betg.
- Emprima varianta: 77 hectaras ed ina producziun da 60 uras gigawatt
- Segunda varianta: 57 hectaras ed ina producziun da 48 uras gigawatt
- Terza varianta actuala: 46 hectaras ed ina prestaziun da 40 uras gigawatt per var 10'000 chasadas (custs: 120 millliuns francs)
- Quarta varianta: dimensiuns exactas anc avertas – pli pauc che 46 hectaras ma almain ina prestaziun da 10 uras gigawatt
La cundiziun oriunda da cuntanscher fin la fin dal 2025 che 10% da la prestaziun sajan en funcziun, n'è betg pli relevant. Quella cundiziun ha il parlament federal abolì. Ma la finamira che l'entira ovra è en funcziun il 2030 valia anc adina, uschia manader da la gruppa da project.
Ussa hai num ir sur ils cudeschs, quintar da nov, chattar avunda pussaivladads per mesiras da cumpensaziun e lura fissan tut las premissas ademplidas per realisar il project en il rom da las cundiziuns per il sustegn da la Confederaziun. Oriundamain avevan ils responsabels quintà cun la lubientscha da construcziun gia l'october da l'onn passà.
Dretgira administrativa ha refusà in recurs
Il mars 2024 ha la vischnanca communitgà che la Dretgira administrativa dal Grischun ha refusà la fin 2023 in recurs cunter l'andament da la procedura d'ina radunanza communala en chaussa l'avust 2023. Ils recurrents han lura decis da betg trair vinavant la sentenzia uschia ch'il recurs è stà giud maisa.
